Instituisaun Estadu Balu Aluga Fatin Ba Edifisiu Kada Fulan Selu $4200-$5800

Hatutan.com, (08 Abríl 2025), Díli—Tuir  fiskalizasaun Komisaun D Parlamentu Nasionál ne’ebé haree ba asuntu Ekonomia no Dezenvolvimentu, identifiká  instituitu públiku balu aluga fatin ba edifisiu kada fulan selu $4200 to’o $5800.

Lee Mós: Timor-Leste iha E.P ho I.P 52 ho Saláriu Kada Fulan Ba Kargu Xefia Sira Ki’ik-liu $2400 To’o $3800

Osan Dolar Amérika. Foto/Google.

Membru komisaun D, Deputadu Antoninho Doutel Sarmento, Tersa (08/04/2025), iha sesaun plenária PN  haktuir fiskalizasaun Komisaun D iha trimestre dahuluk ne’e, katak  Komisaun D identifiká iha instituitu públiku tolu, hanesan Internationál Conservation Timor Leste (ICTL), Autoridade Traballu Timor-Leste (ATTL)  ho Instituisaun Geosiénsia Timor-Leste (IGTL) sira-ne’e kuazé edifisiu  servisu nian ne’e aluga hotu de’it.

“Instituisaun sira ne’e aluga edifisu  ne’e kada fulan selu $5800 no IGTL  de’it mak  selu $5800 to’o tinan-ida ka fulan-12 hasai osan ba selu fatin aluga ba edifísiu   $69,000, ICTL de’it kada fulan selu bá edifisiu aluga ne’e $4200, ATTL kada fulan $5000, ne’e ita imajina orsamentu hira mak Governu gasta bá aluga uma iha  tinan lima nian laran oinsá,” Deputadu Antoninho Doutel Sarmento iha nian intervensaun  iha plenária PN.

Nia afirma tanbasá mak estadu la tau orsamentu para harii rasik nia edifisiu bá instituisaun sira ne’e  para bele koloka ema servisu permanente iha fatin refere, nune’e labele selu kada fulan.

“Husu Governu para haree asuntu ida-ne’e. Haree oinsá mak ezekutór sira kria kondisaun rasik para bele harii edifisiu bá instituisaun ne’ebé Governu estabelese hela, ne’e foin mak ita deskobre balu de’t, seidauk iha instituisaun estadu balu ne’ebé mós aluga tán fatin ba halo edifísiu,” Antoninho Doutel hateten.

Iha biban ne’e  Vise-Ministru Asuntu Parlamentár Adérito Hugo nian iha Parlamentu Nasionál haktuir sei envia asuntu ne’e bá Governu  hodi bele haree asuntu referé.

Jornalista Estajiária: Zita Menezes