Alargamentu Estrada, Komunidade Becora Husu Diálogu no Xanana Deklara Prontu Ba Kadeia

Hatutan.com, (10 Abríl 2025), Díli– Komunidade área Becora prontu kontribui ba alargamentu estrada husi Kulu-hun ba to’o Fati-ahi. Maske nune’e, parte sira ne’ebé nia uma no rai privadu ne’ebé afeta ba prosesu ne’e husu atu iha diálogu ho Governu.

Lee Mós:Prezidente Repúblika husu Governu Xanana Fó Kompensasaun Justu Molok Halo Eviksaun

Primeiru-Ministru, Kay Rala Xanana Gusmão. Foto/Tome da Silva

Beibeik ona komunidade Becora ne’ebé sira-nia rai no uma balun kona alargamentu entrada ne’e husu atu bele iha diálogu tanba sira sente katak Governu, liuliu Sekretária Estadu  asuntu Toponímia no Organizasaun Urbana (SEATOU)  ho Ministériu Obras Públiku (MOP) “manipula” sira ho informasaun dahuluk katak alargamentu estrada ne’e presiza metru tolu no komunidade kolabora ho di’ak tebes, maibé derrepente de’it marka tan dehan alargamentu aumenta ba metru tolu.

Informasaun ne’ebé mai husi saseluk Governu nian ne’e halo komunidade Becora ka komunidade afetadu la satisfeitu no halo reazen hasoru Governu hodi reklama sira-nia direitu hanesan na’in ba rai privadu sira-ne’e.

Ba kestaun ne’e, SEATOU Germano Santa Brites lakohi atu hatene no nia rasik hatán ba komunidade sira katak Lei mak haruka no karik arrogante entuan Lei mak arrogante. Mézmu nune’e,  komunidade afetadu sira kontinua ezije diálogu, maibé Primeiru-Ministru (PM), Kay Rala Xanana Gusmão, hatan hodi dehan,  lori de’it nia ba Tribunál no nia prontu ba kedeia dala-ida tan.  

“Nain ba rai loos dunik, sira hato’o took ba hatudu dehan rai ne’e sira nian, ha’u dehan tiha ona ba sira, ha’u prontu ba kadeia, ha’u ba dala-rua tiha ona, rai-na’in ne’e ita tenke respeita tebe-tebes, ne’ebé ha’u preparadu ona atu ba kadeia, sira lori ba Tribunál ha’u hatene Tribunál katak, Tribunál ida ne’e, ne’e ha’u ba kedan kadeia ona,”  Xanana haktuir ba Jornalista sira hafoin hala’o enkontru ho Prezidente Repúblika (PR), José Ramos-Horta, iha palasiu prezidensiál, Kinta (10/04/2025).

Xanana informa, agora la’ós primeiru vez nia sai Polisia Tranzitu iha Ponte Becora no nia dehan tiha ona  ba SEATOU  ho Ministru Obras Publiká, Samuel Marçal, lalika tahan husik ba.

“Ami atu hahú ona haluan Ponte Becora nian ne’e, halo daudauk ona estrada hosi liman karuk nian hotu tiha, halo fali hosi liman loos nian, ami sei halo daudauk ona to’o fali ponte ida iha sorin balum haluan tihan,” Xanana hateten.

Xefe Governu ne’e lamenta kuandu to’o Becora maka komunidade  sira nune’e nafatin nia  fó ordem halo estrada ida di’ak nian, luan para kareta sira bele liu,  mais mak ne’e iha rai-na’in tenke respeita.

“Lae, ha’u ba kadeia, entaun ita halo tiha moru bo’ot ida, nia labele sae mai Estrada tanba rai ne’e ninian,” Xanana tenik tan.

Atu solusiona, Xefe Govenru dehan komunidade afetadu sira protesta nafatin ba, Governu hadia tiha estrada iha Kulu-hun, halo luan tiha tanba komunidade Kulu-hun partisipa ho laran, hakarak dezemvolmentu.

Jornalista: Tome da Silva