Fundus Rezerva Seguransa Sosiál $190,919,553

Hatutan.com, (14 Abríl 2025), Díli– Fundus rezerva Seguransa Sosiál ne’ebé depozita iha instituisaun finanseira iha rai-laran iha tinan 2023 hamutuk $190,919,553.

Instituitu Nasionál Seguransa Sosiál (INSS) halo audénsia ho PN, Tersa (15/04/2025). Foto/Zita Menezes

‘’Husi tinan 2023 ita adota ka investe iha deposita prazu, iha tinan 2023 ikus, ita nian fundu rezerva seguransa sosiál sa’e bá $190.919.553 no husi totál ne’e ita kapitaliza ka ita halo merkadu finanseiru liuhosi deposita prazu,’’ Prezidenti Instituitu Nasionál Seguransa Sosiál (INSS), Arlindo Pinto relata ba Parlamentu Nasionál liuhosi plenária, Tersa (15/04/2025).

Prezidenti INSS, Arlindo Pinto ne’ebé partisipa iha  audiénsia ho Parlamentu Nasionál ne’e hateten atu halo jestaun finanseiru iha tinan 2023 tuir konstituisaun fundu reserva seguransa sosiál nian, inklui politiká investimentu ne’ebé hetan mós aprová husi Parlamentu Nasionál

Parlamentu Nasionál liuhosi membru Bankada FRETILIN Antoninho Bianco, propoin presiza halo investimentu bá Fundu Reservadu Seguransa Sosiál, atu nune’e, bele asegura iha futuru bainhira Orsamentu Jerál Estadu (OJE) hotu.

“Ha’u hanoin ita ko’lia fundu rezerva seguransa sosiál, tanba ita iha fundu petroleu dalaruma halo investimentu de’it mós monu-hader  mais agora fundu rezerva ne’e seguransa sosiál ha’u haree polítika bá halo investimentu dekretu lei ne’e halo tiha ona, maibé  pratiká ita sei depositu de’it iha banku sira iha rai laran,” Deputadu Antoninho Bianco iha nian intervensaun.

Deputadu ne’e afirma difikuldade fundu reserva seguransa sosiál, mais la asegura karik, tanba laiha kapasidade ka merkadu laiha atu halo investe, tanba ne’e husu Governu bele ezekuta ka lae polítika investimentu bá fundu rezervadu seguransa sosiál.

“Ita tau fundu rezerva seguransa sosiál, kuandu to’o tempu ida OJE laiha mós fundu rezerva seguransa sosiál bele garante bá ema rezime kontribuitivu sira ne’e, tanba haree husi dadus rendimentu  tinan 2022-2025  ne’e ki’ik liu ne’e la garante seguransa sosiál bá oin,” Nia hateten.

Jornalista Estajiária: Zita Menezes