Saúde
Komisaun F Identifika iha HNGV ho Ospitál Referral Simu Estudante Estajiáriu Sira ho Kuantidade Barak
Hatutan.com, (16 Abríl 2025), Díli– Fiskalizasaun Komisaun F Parlamentu Nasionál nian ne’ebé trata asuntu Saúde, Seguransa Sosiál no Igualdade Jéneru ba iha Ospitál Nasionál Guido Valadares (HNGV) ho ospitál referral sira, simu estudante estajiáriu ho kuantidade barak.
Lee Mós: Setór Saúde iha Timor Grave, Pasiente Ida iha HNGV Lakon Tan Vida
Prezidente Komisaun F Parlamentu Nasionál bá asuntu Saúde, Seguransa Sosiál no Igualdade Jéneru, Maria Barreto Gorumali. Foto/Zita Menezes
Prezidente Komisaun F Maria Gorumali Barreto hateten iha pesoál saúde sira ne’ebé mak servisu iha ospitál sira ne’e ho rekursu sira ne’ebé mak natoon, depois haree universidade sira ne’ebé mak loke medisina jerál, Parteira no Enfermeiru sira ne’e kuaze iha universidade hira kedan, depois universidade sira ne’e iha kurríkulu haruka estudante sira halo estájiu iha ospitál sira ne’e no kuantidade barak.
“Ami observa no identifika bainhira komisaun F bá halo fiskalizasaun iha HNGV rasik no bá iha ospitál referral iha Maliana, ami haree katák estajiáriu sira ne’e mai ho kuantidade ida ne’ebé mak barak. Entaun mai ho kuantidade barak afeta mós bá iha kondisaun fatin ka iha ospitál rasik labele akomoda sira, entaun iha buat ne’ebé ami deteta ne’e kuaze korredór sira iha ospitál ne’e nakonu ho estajiáriu sira,” Deputada Maria Gorumali Barreto bá jornalista sira iha PN, Kuarta (16/04/2025).
Nia halo komparasaun sé profisionál Saúde sira husi médiku espesialista mai to’o iha parteira no enfermeiru sira ne’ebé mak halo atendimentu direita bá iha pasiente sira ho kondisaun ne’ebé natoon, maibé ho estaziadu kuantidade barak sé mak bele akompaña estajiáriu sira.
Nia mós husu Ministériu Saúde liuliu superiór na’in tolu ne’ebé mak sai membru Governu iha Ministériu Saúde, tuun direita labele tuur iha edifísiu rona no akompaña relatóriu tuun haree direita hodi haree situasaun sira iha HNGV no ospitál sira.
Jornalista Estajiária: Zita Menezes