Asembleia Parlamentár CPLP Realiza Reuniaun Loron-Rua iha Díli

Hatutan.com, (24 Abríl 2025), Díli– Parlamentu Nasionál hamutuk ho delegasaun Asembleia Parlamentár husi Komunidade Nasaun sira ko’alia Lian Portugés (CPLP, sigla portugés) realiza  Reuniaun Komisaun Ekónomia Ambiente no  Kooperasaun.

Assembleia Parlamentár CPLP. Foto/Zita Menezes

Reuniaun ne’ebé hala’o iha Díli ne’e durante loron rua, hahú Kinta to’o Sesta  (24-25/04/2025). Prezidenti Parlamentu Nasionál Maria Fernanda Lay, espera katák Timor-Leste iha plataforma ASEAN nian ne’ebé  hola parte iha CPLP bele sai ponte ida entre ASEAN no CPLP iha futuru.

Nia afirma  iha vantajen boot tebes-tebes, país ki’ik-oan, maibé ho maun-alin sira seluk Timor-Leste bele tama iha plataforma barak tebes, ne’ebé hanoin Timor-Leste hola parte iha plataforma sira ne’e hodi bele parseria iha mundu tomak.

PPN haktuir delegasaun ne’e ko’alia liubá asuntu rua  ida lingua no kultura no seluk mak liga ho  ekónomia iiha plataforma boot rua nune’e merkadu ne’e bele luan bá Timor-Leste.

“Ha’u haree liubá kooperasaun ne’ebé  Parlamentu Nasionál Timor-Leste nian iha Portugal no país sira seluk, saida mak ita bele aprende husi sira, tanba sira nian país tinan barak liu ita demokrasia,” Maria Fernanda Lay hateten.

Iha sorin seluk  Deputada Nurima Ribeiro Alkatiri hanesan mós membru Asembleia Parlamentár CPLP hateten, reiniaun ida-ne’e nu’udár reiniaun regular ho  asembleia  Parlamentár iha país CPLP ne’ebé hala’o iha Timor-Leste.

“Ajenda ohin nia ko’alia liu kona-bá pontu prinsipál rua; primeiru mak relasaun entre CPLP ho ASEAN ho vizaun katák Timor-Leste preparadu  aderé totalmente bá ASEAN, segundu kona-bá bareira no oportunidade ne’ebé país CPLP iha areá komérsiu no industria,” Deputada Nurima Alkatiri hateten.

Jornalista Estajiária: Zita Menezes