Xanana Husu Sarani Sira Hanoin Maktoban Papa Francisco Nia Prezensa iha Timor-Leste

Hatutan.com, ( 24 Abríl 2025 ), Díli- Primeiru Ministru, Kay Rala Xanana Gusmão, husu sarani timoroan sira atu hanoin hikas  Maktoban Papa  Francisco nia  prezensa iha Timor-Leste, hodi  triste hamutuk  tanba Papa Francisco liu tiha ona mundu seluk. Nune’e husu bá Maromak atu nia hakmatek  iha Maromak nia Kadunan Santu.

Lee Mós: Sarani Katóliku Timor-Leste Realiza Selebrasaun Eukaristia Ba Maktoban Papa Francisco

PM Xanana Gusmão. Foto/Elio dos Santos da Costa

Papa Francisco hala’o nia vizita Pastorál mai Timor-Leste iha loron 09 to’o loron 11 fulan-Setembru 2024. vizita ida ostraordinariu no rai hela memoria furak iha istória sarani no povu Timor-Leste.  

“Ho ida ne’e mak ita mós triste hamutuk ho mundu tomak tanba Papa Francisco liu tiha ona ba mundu seluk.  Ita husu bá Maromak, ita reza bá tuur iha Maromak Nia Kadunan Santu hodi mós tau-matan nafatin bá ita no tau-matan ba rai hotuhotu ne’ebé agora sei funu nafatin,” Xanana hateten ba jornalista sira bainhira to’o iha Aeroportu Internasionál Prezidente Nicolau Lobato, Díli, Kinta (24/04/2025).

Iha biban ne’e, Primeiru-Ministru mós husu  bá timoroan tomak liu-liu bá ukun na’in sira hanoin bá povu ne’e tanba povu mak riku-soin mundu nian.

Husi parte Estadu Timor-Leste nian, liuhosi desizaun Konsellu Ministru nian foin lalais ne’e, dekreta ona lutu nasionál durante loron-hitu (7) no instituisaun estadu hotu husi nasionál to’o suku sira dada bandeira meia-aste.

Amu Papa Fransisco, Papa ida ne’ebé mundu tomak apresia tebes, apresia tanba nia korajen ne’ebé ema hotu hatene asina livru fraternidade humana. Papa ida ne’ebé sempre hakilar konabá funu, nia husu bá funu nain sira ne’e dehan katak hanoin netik ema ne’ebé sofre tanba imi halo funu, ema seluk mak sofre, ema seluk mak mate.

Hodi hanoin hikas Papa Francisco, Governu kria ona ekipa ida hamutuk ho Uma Kreda Lokal Timor-Leste nian atu selebra misa solen ida ba Maktoban Papa Francisco ne’ebé sei hala’o iha Tasi-tolu iha Sábadu, 26 fulan-Abríl ne’e.

Gabinete imprensa Santa Sé mós fó sai ona informasaun sira kona-bá Primeira Kongregasaun Jerál ne’ebé hala’o iha Tersa (22/04/2025), ne’ebé dura oras ida ho balun, hahú hosi tuku 09:00 dadeer to’o tuku 10:30 dadeer oras lokál iha Roma, katak desizaun  loron funerál Maktoban Papa Francisco nian hala’o  Sábadu, 26 Abríl ne’e, tuku 10:00 dadeer oras Itália.

Jornalista: Elio dos Santos da Costa