FRETILIN Kontinua Preokupa ho Problema Setór Saúde

Hatutan.com, (28 Abríl 2025), Díli— Bankada FRETILIN liuhosi sira-nia deklarasaun polítika iha plenária Parlamentu Nasionál, Segunda (28/04/2025), kontinua preokupa ho problema barak iha setór saúde.

Lee Mós: Setór Saúde iha Timor Grave, Pasiente Ida iha HNGV Lakon Tan Vida

Pessoál saúde hosi Sentru Saúde Komunitária Railaco, hala’o konsulta jerál bá pasiente iha suku Tarasu 27 Setembru 2023. Foto/Dok

Membru PN husi Bankada FRETILIN, Veronica Fernandes liuhosi deklarasaun Bankada FRETILIN haktuir sira-nia parte sei la kolen no kontinua hakilar iha uma fukun kona-bá sofrimentu ne’ebé povu enfrenta, liu-liu iha atendimentu saúde nian. Mezmu, dala barak IX Governu Konstitusionál no Bankada Governu tenta nega no finje atu taka no falun metin situasaun reál ne’ebé akontese, maibé faktu hatudu katák, sistema saúde kontinua rahun bá beibeik.

“Bainhira ami toka problema saúde, Bankada governu (CNRT ho PD) ho nia aliadu sira sempre mai ho argumentu oioin dehan ami mak bosok no laran moras bá IX Governu, maibé agora ema mate, kama ba pasiente iha ospitál laiha, sentru saúde balun doutór no enfermeiru duni fila pasiente, no mós laiha karreta funeráriu halo família sira hulan mate isin bá uma, ne’ebé viral tebes iha média sosiál,” Deputada Veronica Fernandes afirma.

Husi kedas formasaun IX governu até a data, saúde laiha mudansa no hetok aumenta gravee liután, maibé Ministra Saúde  sente buat ida lakona, aat liután Primeiru  Ministru Kay Rala Xanana Gusmão no Bankada governu sempre defende Ministra Saúde, Élia A.A des Jesus Amaral, hodi hateten katak, sistema saúde la’o di’ak hela.

Nia dehan, IX Governu mai ho planu no promesa atu hadi’a sistema Saúde. Planu no programa ne’ebé IX Governu Konstitusionál sei realiza iha Setór Saúde mak sei fó atensaun atu hadi’a prestasaun servisu, atu garante asesu jeneralizadu bá servisu saúde ho kualidade no atu promove efisiénsia, transparénsia no profisionalizmu iha jestaun hosi rekursu no infraestrutura sira.

Iha fatin hanesan Vise-Ministru Asuntu Parlamentár Adérito Hugo da Costa haktuir nia parte sei envia asuntu ne’e bá Ministériu relevante hodi buka solusaun bá problema Saúde ne’ebé nafatin sai públiku nia preokupasaun.

 Jornalista Estajiária: Zita Menezes