PN Preokupa Kondisaun Estrada Ainaro ho Manufahi

Hatutan.com (28 Abríl 2025), Díli– Reprezetante povu iha Parlamentu Nasionál preokupa ho kondisaun estrada iha Munisípíu Ainaro no Manufahi ne’ebé  aat tebes hodi difikulta komunidade sira nia movimentu transporte.

Lee Mós: Estrada Sira iha Ainaro Aat Ba Beibeik

Kondisaun estrada aat tebes iha tempu udan, iha postu administrativu Turiscai, Munisípiu Manufahi. Foto/dok. Tomé da Silva.

“Hakarak foti kestaun ida bainhira halo fiskalizasan iha Ainaro, ami estadia iha ne’ebá no konsegé hala’u kapitál Ainaro, mais triste tebes estrada iha kapitál Ainaro aat tebes. Nune’e, ami mós konversa ho populasaun iha ne’ebá sira husu atu reprezentante povu levanta iha plenária nune’e Governu bele tau matan bá estrada Ainaro vila,” Deputadu Natalino dos Santos liuhosi nia intervensaun plenária, Segunda (28/04/2025).

Nia husu Vise-Ministru Asuntu Parlamentár rejistu asuntu ida-ne’e, no hato’o bá iha Minstériu Obras Públiku (MOP), atu bele solusiona estrada iha Ainaro vila.

Iha sorin seluk Deputada Bankada (PD), Sancha Tilman hato’o mós preokupasaun estrada iha Munisipíu Manufahi suku  Sarlala nian katák estrada foin halo iha mandatu Governu anteriór nian maibé estrada kondisaun aat fali ona.

“Estrada ne’e agora komesa aat fali ona, nune’e husu MOP Aatu bele tau atensaun seríu bá estrada ida-ne’e nune’e bele halo manutensaun bá estrada referé nune’e bele minimizá nia gastu  boot liu,” Deputada Sancha Tilman hateten.

Membru Bankada PD  ne’e husu MOP  atu tau matan mós bá estrada iha Tasi-Tolu parte Maslidun tanba tempu udan estrada iha parte Maslidun nakonu ho tahu nune’e difikulta komunidade sira nian atividade.

Iha fatin hanesan Vise-Ministru Asuntu Parlamentár Adérito Hugo haktuir nia parte sei envia asuntu estrada nian   bá iha Ministériu Obras Publikú (MOP) hodi bele fó solusaun.

Jornalista Estajiária: Zita Menezes.