Hahú Ohin Timor-Leste Sai Membru Estadu ASEAN Bá Dala-11, Serimónia Ofisiál Sei Hala’o iha Fulan-Outubru

Hatutan.com, (26 Maiu 2025), Díli—Vise-Primeiru Ministru, Ministru Koordenador Assuntu Ekonomiku, Ministru Turismu no Ambiente, Francisco Kalbuadi Lay, informa ba Hatutan.com liu husi telefónika katak nasaun ASEAN tomak deklara prontu ona simu Timor-Leste tama ba ASEAN hahú Segunda ohin, maibé  seremonia ofisiál sei hahú iha fulan-Outubru, tinan ne’e iha ámbitu Simeira ASEAN ba dala-47 iha Malázia.

Lee Mós: Simeira ASEAN Bá Dala-46 iha Malázia Diskute Asuntu Krize Myanmar To’o Timor-Leste Nia Adezaun

PM Xanana hamutuk ho membru estadu ASEAN partisipa iha semeira ASEAN ba dala-46 iha Kuala Lumpur, Malázia, Segunda (26/05/2025). Foto/Espesiál

“Ita presiza prienxe tekniku balun. Ha’u mós hakarak kongratula povu Timor-Leste tomak, la haluha agrdese ba Prezidente Republika, José Ramos-Horta ne’ebé uza nia diplomasia tomak no liu-liu ba Governu ida ne’ebé lidera husi Primeiru-Ministru Kay Rala Xanana Gusmão, durante ne’e ita tuir reuniaun ASEAN dala-lima, maibé ho grasa Maromak nian ohin sira simu ona Timor-Leste sai membru ASEAN nian bá 11,” Vise-Primeiru Ministru Francisco Kalbuadi Lay hateten hafoin partisipa enkontru  ministru sira membru Estadu ASEAN nian ba dala-46, iha Sentru Konvensaun Kuala Lumpur, Malázia, Segunda (26/05/2025).  

Hosi sorin seluk,  Vise-Ministra Asuntu ASEAN, Milena Maria da Costa Rangel,  agradese ba Maromak no Povu Timor-Leste tanba esforsu n’eebé la’o ne’e esforsu koletivu.

“Nu’udár Timor oan ita tenki agradese tanba ita tama ho prienxe rekejitu sira. Iha fulan-Outubru,  sei iha Simeira ba dala-47 iha momentu ida ne’e sei selebra mós seremonia admisaun Timor-Leste nian, sei partisipa óos husi ita-nia lideransa másimu hotu hamutuk ho lideransa másimu estadu membru ASEAN inklui paseiru dialogu. Ha’u agradese ba Prezidente Republika, Povu Timor-Leste tanba ohin ita bele sai ona membru estadu ASEAN bá 11,” Milena Maria da Costa Rangel haktuir hanesan sita hosi konta Facebook ofisiál  Vise PM no Ministru Koordenador Ekonomia no Ministru Turizmu no Ambiente

Primeir- Ministru Malázia,  Dato’ Seri Anwar bin Ibrahim, iha nia diskursu abertura Simeira ASEAN ne’e mós deklara katak Timor-Leste sei hetan nia adezaun ofisial hanesan membru Estadu ASEAN ba dala-11 iha Simeira ASEAN ba dala-47 iha Kuala Lumpur, fulan-Otubru, tinan ne’e.

Jornalista: Lazaro Pereira Quefi