Komete Violasaun Seksuál, Timor-oan Ida Hetan Pena Prizaun Tinan-Sia husi Tribunál Norwich Crown

Hatutan.com, (12 Juñu 2025), Díli— Tribunál Norwich Crown hasai desizaun hodi fó pena prizaun efetivu tinan-sia (9) ba Timor-oan ida ho inisiál  EG ho idade tinan 23, tanba provadu komete violasaun seksuál hasoru feto ida iha Norfolk,  Reinu Unidu (UK, sigla inglés).

Timor-oan ho insiál EG ne’ebé hetan kondenasaun prizaun efetivu tinan-sia (9) tanba komete krime violasaun seksuál. Foto/Espesiál

Sita  husi Diario online www.greatyarmouthmercury.co.uk katak kronolojia akontesimentu ne’e iha loron 14 fulan-Maiu, tinan kotuk, bainhira kondenadu  EG ba vítima nia uma no vítima toba hela.

Hafoin akontesimentu ne’e,  vítima konta ba nia inan kona-bá ofensa sira-ne’e no iha loron tuir mai, no mós okaziaun ida bainhira nia hetan asaltu hosi EG iha klube kalan ida iha sidade iha loron 05 fulan-Maiu, tinan kotuk.

Vítima hetan enkorajamentu atu hato’o ofensa sira ba polísia hosi nia inan. Hafoin hato’o keixa ba polísia, suspeitu EG hetan kapturasaun iha loron 16 Maiu, tinan kotuk, no tuir mai hetan akuzasaun no hetan prizaun preventiva hodi aprezenta iha tribunál.

Kondenadu EG nia defensor,  Albion Road, Yarmouth, nega violasaun ka asaltu seksuál ne’ebé hamosu kanek korporál loloos (ABH), tentativa violasaun no asaltu liuhosi penetrasaun.

Kondenadu hetan julgamentu iha Tribunál Norwich Crown iha fulan-Marsu no hetan kondenasaun ba ofensa sira hosi juri ida.

EG hetan kastigu durante tinan-sia (9) hosi Juis Andrew Shaw ne’ebé hatete ba nia “feto sira la’ós propriedade atu uza hosi ita-boot” bainhira nia buka atu satisfás “impulsu seksuál ida”.

Juis Shaw hateten vítima maka feto-klosan ida iha nia uma rasik iha ne’ebé nia “iha direitu atu sente seguru”. Maibé nia “hadeer hosi nia toba” no “labele luta hasoru” iha insidente “ne’ebé halo tauk” ida-ne’e.

Hafoin sentensa, ne’ebé akontese iha Sesta, 6 fulan-Juñu, Detetive Konstabel Daniel Wilson hatete, “Ha’u hakarak agradese ba vítima ba nia forsa no reziliénsia esepsionál durante investigasaun ida-ne’e no julgamentu tuirmai. 

“EG maka ofendór ida ne’ebé laiha arrependimentu no perigozu ne’ebé hamosu terus ne’ebé klean ba vítima”. “Ha’u hein katak ho faktu katak nia agora iha kadeia, bele fó ba vítima sentidu justisa no trankuilidade, no ajuda nia iha prosesu kura ka reabilitasaun nian, no hatene katak nia laiha ona pozisaun ba kauza sira no prejuízu liután.”

Ikus liu Detetive mós husu ba ema ne’ebé maka sai vítima ba violasaun ka asaltu seksuál atu relata ba polísia.

Jornalista: Zita Menezes