Bankada PLP Husu CAC Halo Investigasaun Bá Manutensaun Ró Berlin Nakroma ho Kustu $786,000

Hatutan.com, (16 Juñu 2025), Díli– Bankada Parlamentár PLP husi ba Komisaun Anti-Korrupsaun (CAC, sigla portugés) atu halo investigasaun kle’an ba manutensaun Ró Berlin Nakroma ho kustu $786,000.00.

Lee Mós: Kuaze Fulan-Lima Halo Manutensaun ho Orsamentu US$786.000, Agora Berlin Nakroma “Avaria” Fali

Ró Berlin Nakroma. Foto/Espesiál.

“Kona-bá asuntu Ró Berlin Nakroma ne’ebé uluk ha’u levanta ona, no agora husu atu CAC mós halo investigasaun, tanba Ró Berlin Nakroma ne’e foin maka halo manutensaun fulan-lima (5) husi  kompañia rua kompañia lokál naran Trivia no kompañia internasional  PT.  Dewa Ruci Agung tanba hetan fiar husi  Autoridade Prontuáriu Timor-Leste (APORTIL,I.P),” Xefe Bankada PLP, Maria Angelina Sarmento iha nian intervensaun  iha plenaria, PN,  Segunda (16/06/2025).

Ró Berlin Nakroma halo manutensaun iha PT Dewa Ruci Agung, Surabaya-Indonézia ho orsamentu  ba kustu manutensaun $786.000. Manutensaun ne’e han tempu kuaze fulan-lima liu hahú husi fulan-Outubru 2025 no foin fila iha loron 11 fulan-Marsu 2025.

“Ró Berlin Nakroma ne’e nian kodisaun la normal 100% maske prevee orsamentu ne’ebé boot pior liután item tolu (3) ne’e teknikú sira deside hadi’a fali iha Díli, iha Díli ita laiha kondisaun no sé mak atu verifiká no fó garantia katák Ró Berlin Nakroma ne’e di’ak tuir duni padraun Konvensaun SOLAS (Seguransa Moris iha Tasi). Tanba ne’e, presiza halo  investigasaun kle’an nune’e bele garantia kualidade inspeksaun no transparénsia,” Deputada Maria Angelina hateten.

Konvensaun SOLAS hanesan tratadu internasionál ida ne’ebé estabelese padraun mínimu seguransa nian ba ró sira ne’ebé hala’o operasaun iha tasi. Nia objetivu atu prevene lakon vida iha tasi no proteje ambiente tasi nian. Konvensaun ida-ne’e kobre aspetu oioin kona-bá seguransa, inklui konstrusaun ró nian, ekipamentu no operasaun sira.

Deputada Maria Angelina  mós preokupa ho ekipamentu navegasaun  Ró Berlin Nakroma nian balu  hanesan radar ka rede detaction reaning no kompas mós avaria maibé ekipamentu hirak ne’e dehan iha lista doka nian atu hadi’a.

Iha fatin hanesan Prezidente Parlamentu Nasionál, Maria Fernanda Lay  hateten kona-bá asuntu Ró Berlin Nakroma katák kada komisaun Parlamentu Nasionál sira iha nian kompeténsia, nune’e bolu ministériu relevante no membru Governu mai atu bele bele tau-matan bá asuntu espesifikú sira ne’e.

Hanesan informa ona  katak Ró Berlin Nakroma  ne’ebé “avaria” tiha kuaze loron-tolu, Sesta (13/06/2025), hala’o hikas operasaun hodi atende konetividade marítima Díli-Ataúro bá-mai.

Ró Belin Nakroma hahú “avaria” iha loron 10 fulan-Juñu ne’e, tanba falla uitoan ka xave aan tiha  iha  sistema Auxiliar Egine (AE) ida  parte karuk  nian.

“Konsellu Administrasaun APORTI,I.P foti desizaun katak 100% kondisaun  ró normal fali ona  no bele halo ona operasaun dezde Sesta ne’e ho konetividade maritima Díli-Atáuro bá-mai,”  Diretor Kapitazen Nasionál, Rolando Xavier informa ba Hatutan.com  iha edifisiu APORTIL,I.P, Sábadu (14/06/2025).

Iha loron ida antes,  Sesta, 13 fulan-Juñu ne’e, Berlin Nakroma hahú fali operasaun sai husi Portu Díli hale’u  tuku 12:00 meudia no to’o  iha Atáuro  tuku 15:00 Otl. Nune’e,  fila husi Ataúro to’o fali iha Portu Díli hale’u tuku 19:00 Otl.

Iha Sábadu loron tuir mai, Ró Berlin Nakroma sai husi Portu Díli tuku 09:30 dadeer bá Ataúro no fila mai depois Domingu kontinua fali halo operasaun hosi Díli ba Atáuro.

Jornalista: Zita Menezes