Dili
Polísia Kaptura Suspeitu Na’in-Rua Sona José Almeida Correia iha Audian
Hatutan.com, (17 Juñu 2025), Díli –Polísia Nasionál Timor-Leste (PNTL) kaptura no detein ona suspeitu na’in-rua ne’ebé sona José Almeida Correia iha área Audian, Díli, Domingu (15/06/2025).
Komandante PNTL Munisípiu Díli, Superintendente Xefe Polísia Orlando Gomes. Foto/Dok
Komandante PNTL Munisípiu Díli, Superintendente Xefe Polísia Orlando Gomes informa kazu tentativa omisídiu no arma branka ne’ebé mak akontese iha Domingu ne’e iha Audian, suspeitu sona vítima husi kabun mamar parte karuk iha momentu ne’e kedas vítima evakua ba Hospital Nasional Guido Valadares (HNGV) hodi halo tratamentu maibé suspeitu sira halai lakon .
“Ita ninia ekipa konjunta ho ita nia Servisu Intelijénsia sira konjuntu ho ita nia konsege lokaliza suspeitu sira no kaptura suspeitu na’in-rua iha Segunda horiseik hodi submete ba investigasaun,” Superintendente Xefe Polísia Orlando Gomes informa ba jornalista sira.
Informasaun ne’ebé parte investigasaun sira arrola katak kazu ne’e motivu husi sira-nia kolega feto ida hodi halo parte sira sona rezulta vítima kondisaun grave no halo hela tratamentu intensivu iha HNGV.
Jornalista: Juvinal Cabral dos Santos