Prezidente APORTIL,I.P Submente Ona Dokumentu Manutensaun Ró Belin Nakroma Bá CAC

Hatutan.com, (24 Juñu 2025), Díli– Prezidente Autoridade Portuáriu Timor-Leste, Institutu Públiku (APORTIL,I.P), José de Oliveira Leão, Tersa (24/06/2025), informa nia parte submete hotu ona dokumentu tenderizasaun kona-bá manutensaun Ró Berlin Nakroma ho kustu US$786,000.00 ba Komisaun Anti-Korrupsaun (CAC, sigla portugés).

Lee Mós: Auditoria Bá Ró Berlin Nakroma iha Ona Ministru Miguel Manetelu no Presiza Investigasaun Kle’an

Prezidente Autoridade Portuáriu Timor-Leste, Institutu Públiku (APORTIL,I.P), José de Oliveira Leão. Foto/Juvinal Cabral dos Santos

“Auditoriu interna lao tiha ona, ha’u hakarak hateten ba públiku, Kuarta semana kotuk, ami rasik haruka domumentu ba hotu ona CAC kona-bá prosesu tenderizsaun ba Ró Berlin Nakroma. Ami hein CAC halo nia servisu  no tempu  CAC presiza bolu ami prontu ba hatan iha CAC,” José de Oliveira Leão hateten hodi responde Hatutan.com iha resintu Parlamentu Nasionál.

Nia esklarese katak manutensaun Ró Berlin Nakroma ho total kustu manutensaun US$786,000.00 la’ós ba Ró Berlin Nakroma de’it, maibé inklui spare part Ró Ramelau.

“Ha’u klarifika kustu manutensaun US$786,000.00 ne’e la’ós ba manutensaun de’it, maibe tama mós s spare part Ró Ramelau no Ró Nakroma nian  tama hotu iha orsamentu ida-ne’e. Ne’e mak públiku seidauk hatene,” José Leão hateten.

Prezidente APORTIL esplika  kona-ba manutensaun Ró ba tinan ida ne’e ho tinan sira liubá ne’e, sira mai iha APORTIL iha tinan kotuk  fulan-Abril no fulan-Maiu Ró para Novembro mak sira foin haruka Ró sai ba tanba problema ida iha mákina parte loos bee tama ona iha mákina nia laran Ró para labele halai ida-ne’e mak sira halo fali jestaun hodi haruka fali ba Doka iha Indonézia.

“Ami konsellu foun ami la hanoin atu fahe item-rua (2) ne’e ba kompaña-rua (2), maibé item ne’e ba kompaña ida de’it ne’e mak nia sai presu total husi manutensaun Ró ne’e loloos ne’e nia sai US$720,000.00 de’it, maibé ami mós hatama tan ba iha sertifikasaun nian, ba iha Eskritóriu Klasifikasaun Indonézia nian  (BKI/ Biro Klasifikasi Indonesia), ba iha  survey, ba stataory ho mós kustu ba DNTM ne’e mak sai total US$786,000.00, ha’u hakarak esplika tan ha’u iha dokumentu rua  ne’e mak ami tau hamutuk sai ba ida, klaru ema la bele nota hanesan ami halo tanba uluk sira halo fahe tiha ba  rua (2) ema hatene mak ko’alia ida kiik de’it, maibé buat ne’e sira fahe tiha ba rua (2) maibé ha’u ho ha’u nia konsellu foun ami lakhoi fahe,” José Leão afirma tan.

Prezidente APORTIL,I.P ne’e afirma sira tau item ne’e ida de’it ba loos kompañai ida atende servisu ida ne’e  mak total iha ne’e, iha dadus  item primeiru ba iha manutensaun nian Grand Total of scope of works for Shipyard (A) US$359,370.00, iha fali segundu Grand Total of scope of work for Outsources (B) US$360,712.40, husi rua ne’e mak  tau hamutuk US$720,082.40 seidauk inklui  kustu sira seluk tama tan ne’e mak nia total ba US$786,000.00.

“Ha’u hatene deputada barak mós kestiona, maibe ha’u hakarak hateten ha’u lakohi ko’alia sem iha dadus, buat hotu ne’ebé ha’u esplika ne’e ho dadus. Ami iha APORTIL ami nia prioridade boot liu mak konektividade Ró ne’e mak tenke la’o atu povu husi Atauro ho Oé-Cusse labele bele utiliza. Se Ró para mak problema boot ba ami,” nia tenik.

Prezidente APORTIL esplika kompaña PT. Dewa Ruci Agung mak manan na’in ba projetu manutensaun Ró Berlin Nakroma, maibe kompaña PT. Dewa Ruci Agung ba asina  akordu fali ho kompaña lokal sira iha ne’e la’ós problema ho APORTIL nian.

“Ami mos husu duni ba PT. Dewa Ruci Agung para nia reprezenta kompaña iha Timor tanba ami kuandu tama iha ne’ebá haree depois  Ró ba Surabaya fila mai ba oin ne’e la book ona se iha falla buat ruma la iha, mais ami konsellu ida agora ne’e akordu ho PT. Dewa Ruci Agung ho nia reprezentante ne’e problema nian e to’o horseik mós ami simu nafatin spare part ne’ebé mak sira haruka mai ami.”

APORTIL nia kontratu ne’e ho PT. Dewa Ruci Agung no kestaun kompaña Trivia ne’e PT. Dewa Ruci Agung hili Trivia sai hanesan reprezentante Timor.

Prezidente hateten dadaun Ró Berlin Nakroma hahú fila fali nia opersaun hanesan baibain no fallansu iha semana kotuk iha docklist kompletu hotu no husi problema sira ne’e sira mós deteta tan buat barak ona katak uluk Ró ba hadi’a mais la hadi’a 100%

“Probelama ida ne’e mos buat ida mai ami atu deskobre tan manutensaun kotuk to’o ida ami nia tempu agora ne’e, Ró ne’e tinan 20 ona, ami mós labele halo milagre iha APORTIL ami nia esforsu tomak ami halo Ró ne’e tenke la’o, nia iha problema ita tenke simu tanba Ró tuan ona la’ós ba sosa ró foun ida mak mai problema hanesan ne’e,”.

Reseita ne’ebe APORTIL hetan iha fulan-neen (6) husi Janeiru  to’o ultimu ne’e, Segunda (23/06/2025),  ho total US$752,020.18 inklui reseita estasionamentu, aluga fatin, eletresidade no bee.

Jornalista: Juvinal Cabral dos Santos