Nasionál
Governu Aterra Temporaria Estrada Gleno-Letefoho Tanba Kondisaun Grave
Hatutan.com, (25 Juñu 2025), Díli- Ministru Obras Públiku ( MOP), Samuel Marçal informa, Governu aterra temporáriu estrada dirasaun Gleno-Letefoho, Munisípiu Ermera tanba kondisaun grave.
Lee Mós: Tinan ne’e, Governu Hahú Konstrusaun Estrada Gleno ba Letefoho To’o Atsabe
Governu aterra estrada Gleno-Letefoho. Foto/Média GPM
“Tanba imi la ba haree ho matan dalaruma imi hanoin katak, nusa maka aterra de’it, mais kuandu ita ba haree ho matan situasaun iha Letefoho tuun mai grave tebe-tebes. Tanba ne’e maka ita foti asaun ida urjente hanesan emerjénsia ida hodi aterra temporariamente hodi hein kontratu ne’ebé maka tempu badak sei asina,” Ministru Samuel Marçal ba Jornalista sira iha Palásiu Governu, Kuarta (25/06/2025).
Membru Governu ne’e afirma, nian parte lakohi temi data kona-bá bainhira maka atu asina kontratu bá projetu estrada Gleno-Letefoho, maibé nia garantia katak iha tinan ida-ne’e sei realiza.
Nia esplika sei liuhosi prosesu ida tán maka liuhosi Tribunál ba Konta, ne’ebé fiar katak iha tempu badak nia laran ne’e bele han fulan ida no bele fulan rua, mais atu dehan katak iha tinan ida-ne’e nian laran bele asina ona kontratu,” Samuel Marçal hateten.
Jornalista: Zita Menezes