Tribunál Rekursu Deside Halo Re-julgamentu Bá Kazu Zizelma Nia Mate

Hatutan.com, (27 Juñu 2025), Díli—Tribunál Rekursu hatun  despaxu hodi halo re-julgamentu ba   kazu Zizelma Maria Fátima Verdial Gonçalves  nia mate.

Lee Mós: Kazu Matebian Zizelma, Defeza Sidauk Hetan Notifikasaun Husi Tribunál Rekursu

Asistente Eustáquio Guterres. Foto/Marcelino Tomae

Matebian Zizelma Maria Fátima Verdial Gonçalves lakon vida liuhosi asidente tráfegu fatal ne’ebé envolve husi arguidu  ho inisiál MSDC iha área Delta, Funan Buras, iha  Sesta  13 fulan-Marsu 2025, hale’u tuku   08:00 kalan.

Asistente Eustáquio Guterres hateten, despaisu hosi Tribunál Rekurusu avansa bá re-julgamentu  hodi haree fali faktu  foun ne’ebé  antes ne’e konsta iha rekursu.

“Tribunál Rekursu notifika ona ha’u, ohin, mak ha’u simu kazu Zizelma, Tribunál Rekursu aseita hosi ha’u-nia rekursu katak re-julga  bá prosesu ida-ne’e,” Defensor Públiku, Eustáquio Guterres hateten bá jornalista sira iha Tribunál Judisiál Primeira Isntansia Díli, Sesta (27/06/2025).

Nia hatutan, desizaun Tribunál Rekursu nian ne’e klaru, primeiru Tribunál Judisiál Primeira Instánsia Díli tenke haree fila fali faktu provavel no faktu ne’ebé la provavel inklui mós faktu foun ne’ebé aprezenta hosi asistente.

“Hanesan asistente ba prosesu refere konsidera katak sei re-julga filafali ba prosesu ida ne’e. konserteza Tribunál Rekursu nia desizaun tun filafali katak re-julga hodi haree ba faktu sira ne’e,”  nia hateten.

Fó hanoin fali katak, matebian Zizlema Maria Fatima Verdial Gonçalves soke  ho motór ne’ebé kondús hosi arguidu MSDC no iha prosesu justisa ne’ebé hala’o husi Tribunál Judisiál Primeira Instánsia Díli iha loron  18 fulan-Marsu 2025   hatun ona  despaisu  hodi aplika pena  tinan tolu,  suspende tinan haat bá arguidu MSDC.

Iha asidente trafegu ne’e rezulta matebian Zizelma Maria Fatima Verdial Gonçalves hakotu iis nune’e ho asidente trafegu ne’e polísia detein kedan suspeitu MSDC iha sela detensaun oras 72.

Iha prosesu  sumariu, Juiz titular José Gonçalves deside aplika pena prizaun tinan tolu suspende ba tinan haat ba arguidu MSDC no selu indenminizasaun sivil ba danu patrimonial ba  vitima Zizelma Maria Fatima Verdial Gonsalves nia familia ho valor $5000.

Ho desizaun Tribunál nia ne’e, mosu dezentedimentu  entre família vitima no arguidu sira iha resintu Tribunál Judisiál Primeira Instánsia Díli (TJPID) tamba familia vitima la satisfeitu ho desizaun Tribunál nian to’o rezulta arguidu MSC nia feton hetan pankada grave tamba ema baku ho helem to’o monu fatin.

Jornalista: Marcelino Tomae