Karreta Hilux Soke Triton iha Buihomau-Lautem Rezulta Na’in-ida Lakon Vida

Hatutan.com, (02 Jullu 2025), Díli– Asidente tráfegu entre karreta ho marka Hilux soke malu ho karreta ho marka Triton ne’ebé akontese iha estrada área Buihomau, Lautem, Segunda (01/07/2025), tuku 03:00 loro-kraik, rezulta ema na’in-ida lakon vida.

Kondisaun karreta Hilux ho karreta Triton ne’ebé soke malu iha área Buihomau-Lautem, Segunda (01/07/2025). Foto/Repro

Asidente tráfegu  ne’e rezulta mós ema na’in-tolu seluk sofre kanek no evakua kedas ba halo tratamentu intensivu iha ospitál.

Direitór Diresaun Tranzitu Seguransa Rodaviariu (DTSR), Superintendente Asistente Polísia, Luís da Costa, Kuarta (02/07/2025), hateten karreta ho marka Hilux ne’e husi diresaun Dili atu ba Lospalos ho nia velosidade ne’ebé maka’ás soke malu ho  karreta ho marka Triton ne’ebé mak husi diresaun Lospalos atu ba Dili.

Ho kondisaun velosidade ne’ebé maka’ás hosi karreta ho marka Hilux ne’e halo motorista la konsege kontrola ho di’ak no soke kedas karreta ho marka Triton. Iha karreta Hilux nia naran iha ema na’in-rua no iha karreta Triton nia laran iha ema na’in-haat no vítima ida lakon vida ne’e iha karreta Hilux nia laran.

“Seksaun Tránzitu Seguransa Rodoviáriu Komandu Polisia Nasionál Timor-Leste (PNTL) Munisípiu Lautém sira halo prosesu ona, ita espera katak prosesu ne’e levanta ba iha Ministériu públiku,” Superintendente Asistente Polísia, Luís da Costa hateten.

 Jornalista: Juvinal Cabral dos Santos