Konstrusaun Laboratóriu TBC ho Kustu $146,699,67 Halo ho Durasaun Tempu Fulan-Haat

Hatutan.com, (06 Jullu 2025),Díli—Kompañia Gaerenez Unipesoal  Lda, hahú ona halo servisu ba projetu konstrusaun foun Laboratóriu Tuberkuloze ka TBC iha Klínika Bairru-Pité,  Díli.

Kuadru avizu projetu konstrusaun Laboratóriu TBC iha Klinika Bairru-Pité, Díli. Foto/Marcelino Tomae

Projetu ho kustu $146,699,67 tuir termu kontratu ne’ebé estabelese ona entre parte, Fundasaun Klínika Bairru-Pité ho empreza nasionál Gaerenez Unipesoal  Lda, ho durasaun tempu fulan-haat nia laran, hahú husi fulan-Jullu to’o fulan-Novembru, tinan ne’e.

Projetu  ho naran   new construction of  TBC Building  iha  Klínika Bairru-Pité  ne’e finansia husi Gabinete Sosidade Sivíl  (GASC, sigla portugés) hahú  halo servisu iha loron 03 fulan-Jullu ne’e.

Diretora kompañia Gaerenez Unipesoal  Lda, Delia Araújo de Jeseus, hateten sira-nia parte ezekuta projetu ne’e bainhira sira sai hanesan vensedór   konkursu públiku ne’ebé fó sai husi Fundasaun Klínika Bairro-Pité hanesan owner ka na’in ba projetu.

Ba Hatutan.com liuhosi telefónika, Sábadu (05/07/2025),  Diretora kompañia Gaerenez Unipesoal, Lda,  Delia Araújo de Jeseus hateten  sira-nia parte ho Fundasaun Klínika, Bairru-Pité asina kontratu iha loron 02 fulan-Jullu tinan ne’e.

Eklipamentu ne’ebé mak halo mobilizasaun iha projetu konstrusaun ne’e,    empreza Gaerenez Unipesoal  Lda aluga eskavator  ida   hosi empreza  Caltech, no   karreta vaskulante  mak kompañia nian rasik.  Medida  uma foun Laboratóriu TBC  ne’e nia luan 11,56 metru,  naruk metru 20.

Jornalista: Marcelino Tomae