PNTL Detein Ona Suspeitu Oho Peregrina da Conceção Soe iha Jakarta 2

Hatutan.com, (07 Jullu 2025) Díli-Polísia Nasionál Timor-Leste detein ona suspeitu ho inisiál MD ne’ebé deskonfia oho Peregrina da Conceição no soe tuun ba rai-naruk Jakarta 2, Munisípiu Ainaro.

Komunidade ho autoridade evakua mate-isin Peregrina da Conceição iha Jakarta 2, Ainaro. Foto/Espesiál

Portavós Komandu PNTL, Superintendente Polísia João Belo dos Reis,  liuhosi Konferensia Imprensa iha Kuartél Jerál PNTL, Caicoli, Díli,  Segunda (07/07/2025), informa, loron 06 fulan-Jullu 2025, hale’u tuku 11:00 Otl,  komunidade informa ba Polísia Munisípiu Ainaro, katak sira hetan mate-isin ida hamutuk ho nia motór inklui ekipamentu balun iha rai lolon bo’ot ida.

Hafoin ne’e PNTL Munisípiu Ainaro halo kedas intervensaun no identifika pesoál ne’ebé lakon vida ne’e  ho identidade Peregrina da Conceição ho naran istimadu Amina, ho idade tinan 23.

“Servisu Informasaun Polísia (SIP), Servisu Investigasaun Kriminal hamutuk ho Komandu PNTL Munisípiu Ainaro, Komandu PNTL Munisípiu Liquiça halo tracking kedas ba informasaun hirak ne’ebe ita rekolla no ikus mai Domingu (06/07/2025), hale’u tuku 09:00 kalan, kaptura  suspeitu ho inisial MD iha área Postu Administrativu Dom Aleixo, Munisípiu Díli, no agora dadaun Polísia detein ona suspeitu iha Sela Detensaun Eskuadra PNTL Dom Aleixo, Comoro,” Superintendente Polísia João Belo dos Reis  informa.

Informasaun ne’ebé Hatutan.com rekolla hosi sasin oin-oin, hateten haree hosi kondisaun mete-isin matebian  Peregrina da Conceição nian hatudu katak mate-isin kala soe loron rua ka tolu liubá ona ho oin no isin lolon dodook ona bainhira komunidade sira hetan.

Iha Domingu  (06/07/2025), hale’u tuku 10:00  kalan Otl, autoridade sira transporta mate-isin Peregrina da Conceição, mai iha Ospitál Nasionál Guido Valadares (HNGV) hodi hein família sira.

Hale’u tuku 10 kalan,  liu minutu balun, matebian nia maun rasik João Batista da Silva ho família sira seluk to’o mortuariu HNGV no ba haree matebian nia isin-mate ne’ebé posivel submete ba autópsia.

João Batista da Silva, seidauk bele ko’alia ba mídia  kona-bá Peregrina da Conceição nia mate, tanba sira mós lahatene oinsá mak matebian mate ho kondisaun trájiku  ne’e.  

Família sira rona novidade Peregrina da Conceição nia mate haree fali husi ema publika ka share iha média sosiál Facebook.

“Ami Familia  sira mai uluk mortuariu ne’e hela hotu  iha Dili, nune’e kronolojia lahatene matebian sai husi uma iha Aldeia Kaikasiko, Suku  Asumano, Postu-Administrativu Liquiça, Munisípiu Liquiça ne’e oinsá mak ba to’o fali iha Jakarta 2,” nia hateten.

Jornalista: Juvinal Cabral dos Santos