PNTL Asegura Suspeitu Estraga Ai-oan iha Jardín Ai-mutin

Hatutan.com, (11 Jullu 2025) Díli- Polísia Nasionál Timor-Leste (PNTL) asegura ona suspeitu inisial AC ba kazu estraga ai-oan iha Jardín Ai-mutin, Aldeia Postu-Penal,  Suku Comoro, Postu Administrativu Dom Aleixo, Munisípiu Díli.

Ai-oan sira balun iha jardín Ai-mutin hetan estragu husi hahalok ema deskoñesidu. Foto/Juvinal Cabral dos Santos

Komandante PNTL Munisípiu Díli, Superintendente Xefe Polísia Orlando Gomes, Sesta (11/07/2025),  iha Eskuadra Polísia Dom Aleixo, informa abitante  ida ne’ebé estraga ai-oan  iha Jardín Ai-mutin, asegura ona no halo ona identifikasaun nune’e sei aprezenta ba Ministériu Públiku kontinua halo prosesu.

“Informasaun ne’ebé iha katak abitante ka suspeitu ne’e defisiénsia mental, maibé parte kompetente ka profisionál saúde sira fó diagnostika loloos. Polísia nia obrigasaun buka tuir para atu nune’e halo prosesu,” Superintendente Xefe Polísia Orlando Gomes informa.

PNTL konsidera estragu ai-oan  ne’e krimi  tanba tuir lolos hanesan sidadaun tenke proteje jardin ne’ebé estabelese iha sidade laran tanba gasta orsamentu Estadu nian no jardín sira-ne’e di’ak ba ambiente.

Iha Segunda liubá (07/07/2025), ema deskoñesidu estraga tiha ai-oan lubun, ne’ebé empreza konstrusaun estrada Ai-mutin nian kuda iha estrada ninin, hanesan jardín atu aban bainrua bele  fó mahan ba  abitante sira ne’ebé la’o ain iha espasu trotoár ne’e.

Jornalista: Juvinal Cabral dos Santos