CAC Sei Halo Averiguasaun Bá Projetu Konstrusaun Edifísiu RTTL,E.P Ne’ebé Deskonfia iha Abuzu Podér no Korrupsaun

Hatutan.com, (14 Jullu 2025), Díli–Komisaun Anti-Korrupsaun (CAC-sigla portugés) sei halo averiguasaun ka  halibur dadus komprovadu sira   bá  projetu konstrusaun  edifísiu sentrál Rádiu Televizaun Timor-Leste, Empreza Públiku (RTTL,E.P)  ne’ebé deskonfia iha abuzu podér no korrupsaun.

Lee Mós: Deskonfia, Abuzu Podér no Korrupsaun iha Projetu Konstrusaun Edifísiu Sentral RTTL,E.P

Dokumentu kontratu ne’ebé estabelese entre UNDP ho PT Aulia Multi Sarana ba konstrusuan edifisiu Sental foun RTTL,E.P. Foto/Repro

Deskonfia mosu abuzu podér no korrupsaun iha implementasaun projetu konstrusaun edifísiu sentrál foun Rádiu Televizaun Timor-Leste, Empreza Públiku (RTTL,E.P) iha item servisu haat (4) ne’ebé konsta ka kontempla iha kontratu entre  Programa Nasoins Unidas ba Dezenvolvimentu (UNDP, sigla Inglés) nu’udár implementadór  no empreza kontraktor PT Aulia Multi Sarana husi Indonézia.

Haktuir iha dokumentu kontratu ho nia númeru referénsia: 10330000 entre UNDP no empreza kontraktor internasionál PT Aulia Multi Sarana ne’ebé Hatutan.com asesu hamosu duvida iha kontratu projetu ba servisu  item haat iha projetu edifísiu sentrál RTTL,E.P nian ne’e prevalese ho kustu montante US$179,066.90 ho nia diskrisaun hanesan tuir mai ne’e;  

• Mobilizasaun (mobilization) ho nia dezembolsu (disbursement) porsentu lima (5%) husi montante pagamentu (payment amount) US$179,066.90
• Hamoos fatin (site clearing) nia dezembolsu (disbursement) porsentu lima (5%) husi montante pagamentu (payment amount) US$179,066.90
• Estabelesimentu eskritóriu iha fatin (establishment of site office) nia dezembolsu (disbursement) porsentu lima (5%) husi montante pagamentu (payment amount) US$179,066.90
• Sobu/demolisaun no tula (demolition and hauling) nia dezembolsu (disbursement) porsentu lima (5%) husi montante pagamentu (payment amount) US$179,066.90.

Dokumentu kontratu. Foto/Repro

Diretór Investigasaun Kriminal Komisaun  CAC, José Verdial informa  bá Hatutun.com  liuhosi telefonika, Segundu (14/07/2025) hateten, normalmente kuandu iha ona informasaun sira ne’e CAC  sei koko  inisia  hodi haree no halibur tan informasaun kona-bá konstrusaun edifísiu foun  RTTL,E.P nian  ne’ebé deskonfia mosu abuzu podér no korrupsaun iha implementasaun.

“Normalmente   hanesan informasaun ne’ebé Hatutan.com públika, depois ita sei buka tuir, automatikamente kuandu  ami simu  ona iha tempu badak ami rejista tiha ami sei  halibur informasaun sira,”  José Verdial hateten.

Nia fundamenta CAC  sei halibur dokumentu sira iha RTTL,EP atu buka loloos informasaun ne’ebé esplla ne’e loos ka la loos, nune’e ekipa CAC iha tempu badak rejista hodi haree.

Iha Sesta (11/07/2025), Providor Direitus Humanus  no Justisa (PDHJ), Virgílio  da Silva Guterres “Lamukan,” sujere bá parte sira ezekuta projetu konstrusaun Edifisiu sentrál Rádiu Televizaun Timor-Leste, EmprezaPpúbliku (RTTL,EP) tenke halo iha ámbitu transparente.

Diskrisaun item servisu projetu konstrusaun edifísiu Sentral foun RTTL,E.P ho nia kustu sira ne’ebé konsta iha dokumentu kontratu UNDP ho PT Aulia Multi Sarana ho númeru referénsia 10330000. Foto/Repro

Antigu prezidente Conselho de Imprensa Timor-Leste ne’e afirma maske konstrusaun edifísiu sentrál foun RTTL,E.P agora sira halo dadauk ne’e, aban bainrua,  sei  serve hanesan mós fatin  atu halo supervizaun bá entidadade públiku sira atu sai akontabilidade no transperante. Nune’e,  rekomendasaun simples husi PDHJ respeita pratika sira boa-governasaun no tane aas valor transparente.

Virgílio Lamukan fó hanoin fali katak, Primeiru- Ministru Kay Rala Xanana Gusmão  ninia deklarasaun iha Komité Revizaun Orsamentu (KRO), katak povu nia osan tenke jere ho di’ak.

Fó hanoin fali katak projetu konstrusaun edifísiu sentrál foun RTTL,E.P ne’ebé ezekuta husi empreza internasionál PT Aulia Multi Sarana ho nia kustu total  US$3,760,405.00 hamosu duvida no deskonfia mosu pratika abuzu poder no korrupsaun iha servisu  item haat  ne’ebé konsta iha kontratu entre PT Aulia Multi Sarana ho Programa Nasoins Unidas ba Dezenvolvimentu (UNDP) nu’udár implementadór.

Jornalista: Marcelino Tomae