Polísia Detein Suspeitu Na’in-tolu Oho Mario Nelio Quintão Inklui Nia Namorada

Hatutan.com, (15 Jullu 2025) Díli– Polísia Nasionál Timor-Leste (PNTL) detein suspeitu na’in-tolu, inklui vitímia nia namorada ne’ebé deskonfia envolve iha kazu asaltu no omisídiu hodi halakon Mario Nelio Quintão nia vida, Segunda (14/07/2025). 

Polísia detein duspeitu Na’in-tolu ne’ebé emvolve oho Mario Nelio Quintão iha Kuluhun, Díli, Segunda (14/07/2025). Foto/Juvinal Cabral dos Santos

Matebian Mario Nelio Quintão lakon vida iha asaltu no omisídiu ne’ebé akontese iha Segunda (14/07/2025). Molok ne’e ka loron ida antes,  vítima tula nia namorada Dolok-oan no tuir informasaun katak vitima ho nia namoras istori malu tanba de’it vítima  telefone nia namorada la foti.

Tuir informasaun ne’ebé Polísia arrola katak vítima tula-nia namorada iha tuku 03:00 loro-kraik ba Dolok-oan.  Sira na’in-rua istori malu tanba namorada la simu vítima nia telefone, nune’e  vítima tula nia namorada to’o iha Lecidere nia namorada imbox ba nia maun sira  buka tuir duni tuir mai iha Lecidere komesa halo asaltu baku  vítima to’o grave depois lori ba Hospital Nasionál Guido Valadares (HNGV) maibé la konsege salva no  vítima hakotu iis.

“Kazu ida ne’e ita halo prosesu ita identifika suspeitu sira agora detein hela iha Eskuadra Polísia Dom Aleixo kumpre oras  72  depois kontinua prosesu aprezenta ba iha Ministériu Públiku,” Komandante Polísia Nasional Timor-Leste (PNTL) Munisípiu Dili, Superintendente Xefe Polísia Orlando Gomes, ba jornalista sira iha Eskuadra Polísia Dom Aleixo, Tersa (15/07/2025).

Daudaun autoridade PNTL detein suspeitu na’in-tolu ho inisiál ZV, AD, BD ne’ebe mak parte seguransa identifika baku ka  halo asaltu ba matebian  Mario Nelio Quintão.

Suspeitu sira duni tuir vítima husi Lecidere  halai  to’o iha parte  Kuluhun Pertamina hafoin suspeitu sira tebe monu motór hodi halo asaltu no baku to’o vítima  nia kondisaun grave mak lori ba hospital HNGV.

Iha sorin seluk vítima nia aman ki’ik, Pedro Lopes Silveiro iha  sala mortuariu  HNGV ho família tomak ejize hakarak aselera prosesu ne’e lalais ba ema ne’ebé halakon vítima Mario Nelio Quintão nia vida.

“Akontese ba alin ne’e ami família hotu lahatene. Domingu-kalan akontese iha jam 12:00, ami rona fali informasaun husi alin balun iha tuku 2:00 madrugada, dehan kolega balun mak telefone alin ida sira kos hamutuk ne’e dehan akontesimentu ba alin Mario Nelio Quintão agora iha HNGV ne’ebe  ami mai haree nia mate tiha ona,” Pedro Lopes Silveiro hateten.

Matebian Mario Nelio Quintão husi Aldeia Sasae, Suku Fatu Makerek, Postu-Administrativu Laclubar, Munisipiu Manatuto,  moris iha  loron 25 fulan-Agostu 2005. Família sira fó fiar ba autoridade seguransa halo investigasaun kle’an, atu nune’e,  família hetan informasaun serteza.

Jornalista: Juvinal Cabral dos Santos