Janeiru-Juñu, Polísia Asegura Karreta ho Motór 1343

Hatutan.com, (21 Jullu 2025), Díli-Durante períodu fulan-neen, husi  fulan Janeiru to’o fulan-Juñu 2025, Polísia Nasionál Timor-Leste (PNTL) Munisípiu Díli asegura veíkulu (motór ho karreta) 1343 tanba komete infrasaun, hanesan viola regra tránzitu no  balun laiha dokumentu komprovadu.

Polísia asegura viekulu sira ne’ebé komete infrasaun. Foto/Juvinal Cabral dos Santos

Husi veíkulu hirak ne’e, 600-resin mak veíkulu ne’ebé pertense  ba Direção Nacional de Patrimônio do Estado (DNPE). Nune’e, despaxa ona veíkulu 400 ba Patrimóniu Estadu no hela 400 mak sei estasiona iha areadores Komandu PNTL Munisípiu Díli.

“Veíkulu  sira ne’ebé mak Polísia asegura tanba infrasaun ho  evidensia sira ne’e hotu,  bainhira  liu ona prazu loron 90 ba leten, ita halo pedidu ba  iha patrimóniu estadu hodi entrega ba iha patrimóniu estadu,” Komandante PNTL  Munisípiu Díli, Superintendente Xefe Polísia Orlando Gomes, ba jornalista sira, Segunda (21/07/2025).

Superintendente Xefe Polísia Orlando Gomes hateten evidensia transporte balun seidauk bele entrega ba Patrimóniu Estadu tanba iha ligasaun ho krime nian, entaun hein prosesu bainhira despaxu ruma tun mak hafoin entrega motór ho kareta sira ne’e ba iha patrimóniu estadu.

“Agora ita nia investigasaun mós prepara hela pedidu hato’o hela ba Ministeriu Públiku evidensia liga ho kazu krimi ne’e husu despaixu para entrega motór ho karreta sira ne’e ba iha patrimóniu estadu, maibé asegura infrasaun ne’e liu ona tempu ita halo mós pedidu ba iha patrimóniu estadu atu bele entrega ba iha patrimóniu estadu,” nia esplika.

Dadus ba transporte sira ne’ebé Polisia Tránzitu  Munisípiu Díli asegura husi fulan-Janeiru to’o  loron 21 Jullu 2025, karreta ne’ebé envolve asidente grave no kaman hamutuk 533, asidente  motór  701, asidente soke ema la’o ain  105, kazu ne’ebé iha akordu rezolve ona mak 326, kazu sira ne’ebé sei prosesu ne’e mak 299.

Jornalista: Juvinal Cabral dos Santos