CNRT Sei Ko’alia ho Lidér Bankada Hotu Hodi Halakon Pensaun Vitalisia

Hatuan.com, (22 Jullu 2025), Díli– Xefe Bankada CNRT ,Deputadu Duarte Nunes hateten, hafoin resesu hotu,  CNRT sei ko’alia ho lidér Bankada husi PD, FRETILIN, KHUNTO no PLP  hodi halakon pensaun vitalisia.

Lee Mós: PN Prepara Ona Ezbosu Revizaun Lei Pensaun Vitalisia

Xefe Bankada CNRT, Duarte Nunes. Foto/Zita Menezes.

“Agora tama fali mai maka hotu-hotu konkorda ha’u lee iha mídia rejista iha ha’u nian ajenda fila mai ha’u sei konsulta iha lidér bankada hotu-hotu konkorda ha’u konsulta ho partidu ami avansa,” Deputadu Duarte Nunes bá Jornalista sira iha PN, Tersa (22/07/2025).

Lidér Bankada CNRT ne’e esplika tanba sira oposizaun ko’alia duun bá Bankada Gvernu  mais sira mós aproveita hela, entaun prontu ne’e sira nian direitu ko’alia, mais resesu tama mai  sei rejista no ko’alia ho kolega Deputadu sira.

“Mais Deputadu hotu-hotu la’ós ha’u de’it tanba ha’u votu ida de’it, ita bá iha ne’ebá lakon ita atu duun bá sé. Buat ne’e mai dala hira ona, ami tenta dala hira ona, ko’alia iha oin, maka hanesan ne’e mais iha kotuk iha reuniaun sira dehan hein lai, agora sira hotu-hotu duun ona mai dehan Bankada  apoiu Governu maka lakohi,”Deputadu Duarte Nunes hateten.

“Ita halo lei ida para hapara tiha pensaun vitalisia  ne’e, importante hotu-hotu hakarak, maiória ne’e hanesan ne’e hakarak ami halo desizaun para sira mós aproveita ka halo nusa, ita hotu hakarak entaun avansa,” nia afirma.

Iha fatin hanesan Deputadu António Verdiál de Sousa hateten, desde uluk ida-ne’e maka Bankada KHUNTO hakarak halo no sei apoiu tebes bá Bankada Governu.

“Ha’u kontenti loos kuandu partidu boot lidera Governu maka hakarak halo ideia ida-ne’e, sé ida-ne’e maka iha, ha’u hateten Bankada KHUNTO suporta tebes loos katak lei pensaun vitalisia ne’e labele iha duni,” Deputadu António Verdál de Sousa hateten.

Xefe Bankada KHUNTO ne’e hateten la’ós hamoos iha regra para trata asuntu ne’e, lakohi duun malu tanba  ko’alia ho onestu sé ida-ne’e maka iha di’ak liu halo lakon de’it lei Pensaun Vitalisia.

Iha sorin seluk Xefe Bankada FRETILIN, Deputadu Aniceto Guterres ne’ebé jonralista sira entrevista antes ne’e hateten “Ami FRETILIN nunka promete bá ema ne’ebé ita boot sira bá husu Bankada Governu sira. FRETILIN nunka promete kona-bá pensaun vitalisia, Bankada Governu sira maka durante ne’e halo promesa uza pensaun vitalisia halo politiku,”.

Jornalista : Zita Menezes