Dili
Asesór SEKOMS “Hadau” Knaar Jornalista Sira-Nian Maske Inkompativel Ona
Hatutan.com, (22 Jullu 2025), Díli— Asesór bá komunikasaun sosiál husi Sektretária Estadu Komunikasaun Sosiál (SEKOMS), Augusto Turki inkompativel ona ho knaar jornalista tuir artigu 17 aliña d Lei Komunikasaun Sosiál, mas kontinua “hadau” knaar jornalista sira-nian hodi husu pergunta ba fontes relevante sira ne’ebé hala’o konferénsia imprensa iha Media Center ka Sentru Mídia bá jogu desportivu Komunidade Nasaun sira Ko’alia Lian Portugés (CPLP, sigla portugés) ba dala-XII iha Timor-Leste.
Asesór SEKOMS, Augosto Turki ‘hadau” knaar jornaista sira nian hodi husu pergunta ba fontes sira iha konfénsia imprensa jogu disportivu CPLP iha media centre. Foto/Marcelino Tomae
Tuir observasaun Hatutan.com nian iha Mídia Center ne’ebé estabelese husi SEKOMS iha Sentru Konvensaun Díli (CCD), Tersa (22/07/2025), hale’u tuku 03:00 loro-kraik, hatudu katak asesór SEKOMS, Augosto Turki ne’ebé Conselho de Imprensa de Timor-Leste dada-hikas tiha ona nia Karteira Profisionál tanba inkompativel ona ho knaar jornalista nian, kontinua hala’o knaar hanesan jornalista hodi soe pergunta ba Sekretáriu Estadu Komunikasaun Sosiál (SEKOMS), Expedito Dias Ximenes, bainhira halo konferénsia imprensa iha ámbitu halo vizita surpreza ba Media Centre ba jogu desportivu CPLP iha CCD.
La’ós ne’e de’it, Asesór Agosto Turki nu’udár eis-xefe redasaun no eis-jornalista Timor Post ne’e mós uza rompi (kolete) Press nian ne’ebé SEKOMS prodús hodi atribui ba jornalista sira ne’ebé halo kobertura ba eventu jogu desportivu CPLP nian ba dala-XII, inklui soe pergunta ba fontes sira oioin ne’ebé halo konferénsia imprensa molok hahú jogu no depois jogu.
Konferénsia imprensa nu’udár eventu ofisiál ne’ebé hala’o husi fontes informasaun sira hodi hato’o informasaun importante ba públiku liuhosi meius komunikasaun sosiál, nune’e mós fó oportunidade ba jornalista sira atu husu pergunta no hetan klarifikasaun. Objetivu maka atu harii transparénsia, hato’o notísia sira, klarifika kestaun sira, no hatán ba pergunta sira hosi jornalista kona-ba eventu ka desizaun ida.
Lee Mós: Eventu Jogu Desportivu CPLP, Kartaun Asesu Bá Jornalista Sira Laiha Kualidade
Asesór SEKOMS, Augusto Turki ‘hadau” knaar jornaista sira nian hodi husu pergunta ba fontes sira iha konfénsia imprensa jogu disportivu CPLP iha media centre. Foto/Marcelino Tomae
Asesór ne’ebé inkompativel ho knaar jornalista nian hanesan kontempladu iha artigu 17 Lei Komunikasaun Sosiál Timor-Leste, laiha direitu no la iha devér étika, atu hala’o ka substitui knar jornalista sira nian iha kualkér eventu no kualkér atividade.
“Bele ka? Asesór SEKOMS nian husu fali pergunta ba SEKOMS iha konferénsia imprensa ofisiál ne’e? ne’e, la’ós foin akontese tanba durante ne’e fontes sira halo konferénsia imprensa iha media centre jogu desportivu CPLP nian, asesór SEKOMS Augosto Turki sempre hadau malu ho ami husu pergunta,” jornalista sira hateten ba malu ho duvida.
Hafoin remata konferensia imprensa Hatutan.com tenta konfrima orsamentu $30,000.00 ne’ebé aloka ba Sekretariadu Estadu Komunikasaun Sosiál (SEKOMS) atu finansia nesesidade hotu media centre iha CCD inklui fornesimentu liña internet no alimentasaun ba jornalista sira ne’ebé kobre iha media centre, maibé Expedito Dias Ximenes dezmente fó komentáriu.
Remata tiha konferénsia imprensa husi SEKOMS nian, parte sira Prezidente Komite Paralémpiku ne’ebé reprezenta husi nasaun tolu hanesan Angola, Portugál ho Timor-Leste halo konferénsia imprensa iha media centre mós asesór SEKOMS Agosto Turki kontinua hadau knar jornalista sira nian hodi husu pergunta ba fontes sira.
Lei Komunikasaun Sosiál Artigu 17 kona-bá Inkompatibilidade iha númeru ida (1) hateten profisaun jornalista nian labele hala’o hamutuk ho funsaun hirak tuir mai:
a). Funsionáriu públiku;
b). Kaer kargu ruma iha órgaun soberania ida, iha órgaun podér lokál sira ka iha lideransa komunitária;
c). Dirije partidu polítiku
d). Relasaun publika ka asesór imprensa, komunikasaun no imajen;
e). Kualkér atividade ida ne’ebé atu promove bens no servisu hanesan publisidade
Jornalista: Marcelino Tomae