Governu Hahú Análize Relatóriu Finál Auditória Interna Servisu Administrasaun Públika

Hatutan.com, (31 Jullu 2025), Díli– Konsellu Ministru hahú reuniaun ho análiza bá relatóriu finál auditória interna servisu Administrasaun Públika nian ne’ebé hala’o husi EY Portugál, empreza auditória no konsultoria ne’ebé integra husi internasionál Ernst & Young.

Reuniaun Konsellu Ministru.Foto/Dok

Komunikadu imprensa ne’ebé Hatutuan.com asesu husi Gabinete Presidensiá Konsellu Ministru (PCM, sigla portugés), informa   EY Portugál hanesan membru husi EY Globál, ida husi organizasaun mundiál haat ne’ebé ho servisu profisionál boot liu, ho esperiénsia barak hodi realiza auditória bá entidade públika no privadu.

Durante sorumutuk Konsellu Ministru sira-nia, Kuarta (30/07/2025), aprezenta konkluzaun no rekomendasaun prinsipál sira husi auditória nian ne’ebé hala’o ona bá entidade administrasaun direta no indireta Estadu nian.

“Identifika ona dezafiu prinsipál no área ne’ebé presiza hadi’a iha prosesu no prosedimentu. Governu simu rekomendasaun husi EY no reafirma ninia kompromisu ho transparénsia, governasaun di’ak no melloria kontínua efisiénsia iha jestaun finansa públika nian,” Hatutan.com sita komunikadu imprensa.

Prosesu auditória ida-ne’e refleta kompromisu ida ne’ebé Primeiru-Ministru, Kay Rala Xanana Gusmão, halo iha ninia diskursu simu pose nian, iha ne’ebé nia define ona hanesan prioridade ida husi ninia Governu atu halo auditória bá instituisaun públika balu, ho objetivu atu promové responsabilizasaun boot liu no rigór iha administrasaun Estadu.

Jornalista : Zita Menezes