Veteranu Alin Laek La Satisfás ho Servisu Ministériu Públiku

Hatutan.com, (31 Jullu 2025), Díli-Veteranu Custódiu Belo “Alin Laek” la satisfás ho servisu Ministériu Públiku (MP)  tanba iha keixa balu ne’ebé nia submete ba  MP,  maibé ikus mai MP notifika nia hodi konsidera laiha indikasaun krime.

Veteranu Custodio Belo “Alin Laek”.

Veteranu Custódiu Belo “Alin Laek” hatama keixa ba MP relativa ho ema ka pesoál sira balu (liu ema na’in-tolu) empresta nia osan, hamutuk dala tolu tuituir malu, ho total montante $18,000.00 no kada fulan tuir akordu ne’ebé sira estabelese ho nia jurus ka funan porsentu 20 (20%).

Ho notifikasaun ne’ebé hakerek ho portugés “No Caso Concreto Custodio Belo e o suspeito JP realizaram o acordo de concordância  verbalmente entre ambas para se emprestar  dinheiro  incluido taxa  de 20%  por mes” halo Komandante FALINTIL Custodio Belo “Alin Laek” hirus loos hodi hakat to’o iha edifísiu Ministériu Públiku iha Matadoru, Díli, Kinta (31/07/2025), hodi hakilar no halo barullu uitoan iha resintu MP nian ne’e.

“Ema sira ne’e empresta tiha ha’u nia osan iha loron 27 fulan-Jullu 2021, tuir akordu ne’ebé ami asina hamutuk ho montante primeiru $10,000.00 ho nia funan ka jurus kada fulan 20%. To’o agora sira la selu no balun halai lakon tan tiha ba Indonézia sai sidadaun Indonézia ona. Nune’e, ha’u hatama keixa atu bele prosesa ema sira ne’e, maibé MP hateten fali ne’e la iha indikasaun krime atu prosesa ba oin,” Komandante FALINTIL, Alin Laek  haktuir ba Hatutan.com hafoin halo kritika no protestu maka’as iha edifísiu MP iha Matadoru, Dili.

Alin Laek konta tuir katak   iha akordu empréstimu osan ne’e,  primeiru parte hanesan pesoál ne’ebé empresta osan sita iha akordu laran katak liu loron 30 sei fó fila fali ka reembolsa montante osan $10,000.00 ho nia jurus ka funan 20%, katak  $12,000.00

Bainhira tempu empréstimu  malu osan ne’e liu ona prazu loron 30, veteranu Alin Laek hanesan osan na’in ba buka parte sira empréstimu osan ne’e hodi ezije fó fila nia osan, maibé parte sira lori fali dokumentu ida iha leten asina husi maun-boot Xanana, katak parte sira ho nia parseiru iha Indonézia  hetan projetu atu hamata ró substitui Ró Belin Nakroma, maka sira husu tan fó empréstimu ho montante $5000.00.

Momentu ne’ebá Komandante Alin Laek, la tetu ho kle’an tanba dehan atu hatama ró, nia transfere tan osan $5000.00  liuhosi Banku Mandiri ba Indonézia haruka ba pesoál ho inisiál JF ho intensaun atu fasilita prosesu administrasaun hatama ró husi Indonézia.

“Dehan hatama ró atu substitui Ró Berlin Nakroma ne’e ha’u garantia ona tanba ró ne’e mai bele ajuda fó fila ha’u nia osan. La kleur, sira husu tan aumenta osan $3000.00 dehan atu kompleta tan dokumentu ró nian, nune’e la hanoin barak, ha’u fó tan osan ho total osan husi núnsiu hamutuk ona $18,000.00  

To’o agora ró mós la mai, osan ne’ebé parte sira empréstimu ne’e laiha ona komunikasaun, Alin Laek lori dokumentu akordu sira ne’e ba MP atu bele prosesa, maibé infelizmente notifikasaun eskrita ne’ebé Alin Laek simu husi MP katak tanba empréstimu ba malu ne’e iha akordu, maka la iha indísiu krime halo veteranu Alin Laek hirus boot no hakilar  iha Ministériu Públiku hodi lia tun dehan MP servisu la loos, karik futu-lia ho grupu mafiozu sira no seluk-seluk tan.

Defensor Públiku  Estáquio Guterres

Iha sorin seluk, Defensor Públiku  Estáquio Guterres,  haktuir veteranu Custódiu Belo ‘Alin Laek’ hakilar iha Ministériu Públiku tanba  kazu ne’e antes sira halo kontratu imprestimu ida, mais depois de kontratu imprestimu ne’e, agora ema ida empresta ne’e  dadauk halai ba fali tiha Indonesia  dalaruma nia prosesu ne’e mós lao kleur tebes ona atraves husi Defensór Públiku nune’e nia la satisfaz hodi barullu iha Ministériu Públiku.

 “Veteranu Alin Laek mai tan fila fali iha Ministériu Públiku hato’o keixa iha ne’e, nia hakarak prosesu krime  ida ne’e atraves husi krimi, maibé komu tama iha  Ministériu Públiku ida ne’e depois investiga to’o kle’an tiha haree ba faktussira balun Ministériu Públiku haree dehan katak kazu ida ne’e la iha krimi ida. Entaun Ministériu Públiku husu atu arkiva tiha ida ne’e halao prosesu tuir sivíl ninian, entaun talvés ida ne’e mak veteranu  Alin Laek hirus no halo barullu iha MP,”  Estáquio Guterres hateten.

Jornalista: Juvinal Cabral dos Santos