Polísia Halo Buska no Apreensaun iha Gabinete Reitór no Pro-Reitór Sira UNTL

Hatutan.com, (06 Agostu 2025), Díli-Autoridade Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK), Kuarta (06/08/2025), hale’u tuku  09:00 dadeer, halo buska no apreensaun ba Gabinete Reitór, Pr-Reitór ho dirijente sira Departamentu Payroll & Kontabilidade iha Universidade Nasionál Timor Lorosa’e (UNTL).

Autoridade Polísia halo buska no apreensaun iha Gabinete Reitór, Pro-Reitór no Departamentu Payroll UNTL, Kuarta (06/08/2025). Foto/Juvinal Cabral dos Santos

Prezensa autoridade Órgaun Polisiál Kriminál nian ne’e iha UNTL hodi ezekuta mandadu Tribunál Judisiál Primeiru Instánsia Dili (TJPID) ho Númeru Úniku Krime (NUC) 01 86/25-PNSIK.

Molok ho buska no apreensaun ne’e, autoridade Polísia aprezenta  uluk madadu husi Tribunál ba Reitór UNTL, João Soares Martins, relativa ho deskonfia ba indísiu krime falsifikasaun dokumentu no anotasaun téknika ne’ebé previstu husi artigu 303° husi kódigu penál Timor-Leste.

“Ami ezekuta mandadu buska no apreesaun husi  Tribunál Judisiál Primeira Instánsia Dili (TJPID) ami presiza señor Reitor nia fatin ne’ebé ami sei buska ba nia fatin, inklui na’in lima seluk” órgaun Polisiál  aprezenta ba Reitór UNTL.

Iha buska no apreesaun ne’e órgaun Polísia Kriminál arrola dokumentu nu’udár prova balu hanesan resibu   ba ezekusaun orsamentu UNTL nian inklui dokumentu sira ne’ebé sai hanesan relatóriu anuál no  ekipa mós arrola evidénsia sira hanesan osan.

Tuir observasaun Hatutan.com husi mandadu buska no aprewsaun ha Universidade Nasionál Timor Lorosa’e (UNTL)  ne’e hetan seguransa másimu husi Batallaun Orden Publika (BOP),  depois remata buska no aprresaun iha Universidade sei kontinua ba rezidénsia sira ne’ebé deskonfia hanesan alvu investigasaun.

Jornalista: Juvinal Cabral dos Santos