Membru Komisaun Rekrutamentu PNTL Ne’ebé Komete Irregularidade Hasai

Hatutan.com, (07 Agostu 2025), Díli- Ministru Interiór (MI), Francisco da Costa Guterres, husu komisaun rekrutamentu ba kandidatu kadete  foun Polísia Nasionál Timor-Leste (PNTL) 2025 atu presta servisu ho imparsiál no hadook aan hosi konflitu interese.

Lee Mós: Evita Familiarizmu iha Rekrutamentu Kandidatu Kadete Foun PNTL 2025

Ministru Interiór, Francisco da Costa Guterres. Foto/Juvinal Cabral dos Santos

Ministru Interiór  Francisco da Costa Guterres, Kinta (07/08/2025), afirma bainhira parte Komandu Jerál PNTL ho Ministériu Interiór, identifika ka nota membru komisaun juri rekrutamentu servisu la di’ak ka komete irregularidade hasai kedas hodi troka fali ema seluk.

Ministru Interiór ne’e mós rekomenda ba jornalista ho órgaun komunikasaun sosiál sira atu asume papél kontrola sosiál hodi ajuda prosesu rekrutamentu ne’e tenke la’o ho justu no transparente atu rekrutamentu ne’e la’o ho loloos no tuir prinsípiu sira ne’ebé hatuur ona iha mata-dalan rekrutamentu nian.

“Ita hotu-hotu tenke tau-matan, imi  jornalista no média sira labele hein de’it fali ami, imi mós tenke haree se iha buat ruma ko’alia sai  atu nune’e ami bele halo intervensaun,”  Ministériu Interiór Francisco da Costa Guterres ba jornalista sira iha Ministériu Interiór, Díli.

Rekrutamentu PNTL modalidade 20% husi veteranu ne’e tenke kumpre hotu rekizitu  ne’ebé hatuur ona, nune’e mós idade ba kandidatu kadete foun husi tinan 18 to’o tinan 23.

Iha sorin seluk portavós Komisaun Rekrutamentu Polísia Nasionál Timor-Leste (PNTL) Superintendente Antonio da Luz haktuir Diploma Ministeriál  N°. 17/2025 de 25 de Juñu ne’ebé sita iha artigu 20°, 21° no mós artigu 22° ko’alia kona-bá kondisaun admisaun  jerál ninian.

Regulamentu ba konkursu admisaun públika ba kursu formasaun ba ajente Polísia Nasionál Timor-Leste ba rekrutamentu total kandidatu na’in-400.

“Ami garantia prosesu rekrutamentu servisu ho profisionál ami sei la favorese ba ida de’it tanba Timoroan hotu iha direitu ba prosesu ida-ne’e, ami la haree ba A no B ami halo tuir de’it tuir Lei no regulamentu sira,” Superintendente Polísia Antonio da Luz hateten ba jotnalista sira Sentru Formasaun Akademia-PNTL (CFA-PNTL).

Kadete foun PNTL ne’ebé foti ona formuláriu rekrutamentu husi Munisípiu Aileu, Ainaro, Atauro, Baucau, Bobonaro, Covalima, Dili, Ermera, Lautem, Liquiça, Manatuto, Manufahi, Oe-Cusse, Viqueque inklui Centro Formasaun Polísia Akademia Díli,  iha loron 05 fulan-Agostu 2025, kompostu husi  mane na’in-1.233, feto na’in–422  ho total na’in-1.655.

Iha loron 06 fulan-Agostu 2025, joven sira fotu formuláriu kompete ba vaga PNTL 2025 kompostu husi   mane na’in-690  no feto na’in-267 ho total na’in-3.666.

Jornalista: Juvinal Cabral dos Santos