CAC Rejista Kazu 400-Resin Husi RAEOA, Inklui Ró Haksolok

Hatutan.com, (08 Agostu 2025), Díli– Komisaun Anti-Korrupsaun (CAC-sigla portugés)  rejista kazu  investigasaun husi   Rejiaun Administrativa Espesiál Oé-Cusse Ambeno (RAEOA) ho total kazu 400-liu, inklui kazu Ró Haksolok.

Lee Mós: Komisaun C PN Sei Vizita Ró Haksolok, Bankada FRETILIN: Di’ak Liu Tan

Komisáriu CAC, Rui Pereira dos Santos. Foto/Dok

Komisáriu  Komisaun Anti-Korrupsaun, Rui Parreira dos Santos, hateten, prosesu investigasaun bá  Ró  Haksolok ne’e parte ida husi kazu ne’ebé maka iha komisáriu CAC sestante atuál Ministru Justisa, Sergio da  Costa Hornai nia tempu ne’e kompostu husi kazu projetu problemátiku hamutuk 35 maka  iha Oé-cusse nian,  inklui  ró Haksolok ne’e iha laran. 

“Iha ha’u nia komputadór laran ne’e file Oé-Cusse nian ne’e  hamutuk 400-resin,  ne’e kazu lubun boot maka iha laran, tanba ne’e ami hein de’it kuandu Ministériu Públiku fahe fali prosesu sira ne’e, Ró Haksolok tau ketak,  aviaun ZEESM tau ketak, uma ho rai ne’e tau ketak, prosesu sira ne’ebé ita temi ne’e tau ketak-ketak  para kazu balun ita bele la’o, la bele hein Ró Haksolok ne’e, balun ita tenke la’o uluk ona,”  Komisáriu CAC, Rui Parreira dos Santos hateten bá Hatutan.com iha nia knaar fatin Faról, Díli, Kuarta foin lalais ne’e

Nia dehan, Ró Haksolok kuandu vákuu, iha ne’e dokumentu  sira ne’e  CAC  entrega fila fali  bá iha Ministru Públiku,  informasaun ikus ne’ebé maka  nia hatene tuir  katak kazu ne’e Ministériu Públiku delega bá iha PCIC, maibé komu na’in maka Ministériu Públiku, maka  CAC hein  fali delegasaun.

Nia haktuir, kazu balun nia prosesu la’o hela  hanesan   Aviaun ZEESM,  CAC rona ona depoimentu husi sasin lubuk ida ona,  maka ne’ebé sira  rekolla ona, maibé CAC  iha difikuldade tanba aviaun ne’e sosa iha Canada, enkuantu  Canada rasik nia Embaixada  laiha Timor-Leste. 

Nia subliña,  sei iha nesesidade CAC  atu koordena ho Ministériu Negósiu Estranjeiru no Kooperasaun, hodi halo  komunikasaun ho  embaixada Canada iha Jakarta, hodi bele fasilita  bá prosesu investigasaun. Maibé, nia dehan,  CAC seidauk to’o iha ne’ebá, tanba  prosesu ne’e sei la’o hela no investigadór sira sei halo sira nia servisu.

Jornalista:  Marcelino Tomae