Devolve Komputadór UNTL Hein Rezultadu Investigasaun

Hatutan.com, (22 Agostu 2025), Díli— Ministériu Públiku atu devolve komputadór Univesidade Nasionál Timor Lorosa’e (UNTL) nian depende bá rezultadu investigasaun no  rezultadu ezame laboratóriu.

Lee Mós: UNTL Husu PNTL ho MP Devolve Komputadór UNTL Nian

PGR Nelson de Carvalho. Foto/Média G-PR

Kestaun ne’e hato’o husi Prokuradór Jerál Repúblika  (PGR-sigla portugés), Nelson de Carvalho bá jonnalista sira hafoin remata reiuniaun revizaun komité orsamentu  jerál Estadu 2026 iha Ministériu Finansas, Sesta (22/08/2025). Nia dehan karta ne’ebé UNTL haruka bá Ministériu públiku iha ona koñesimentu, maibé sei iha prosesu ezame labotóriu.

“Karta ne’e,  sim! UNTL  haruka ona bá ha’u,  maibé ne’e la’ós hensan buat ida ke, ita bá  impresta sasán,  sei tama iha buat ruma ne’ebé maka ita konsidera hahensan indisiu  ita tenke ser halo ezame labotórium no investigasaun,” PGR Nelson  de Carvalho informa.

Kona-bá MP  sei devolve  fali  komputadór UNTL,  tuir nia katak,  bazeia buska  apreensaun  bá UNTL ne’e, tanba iha indisiu balun,  tanba  buat ida bá investigasaun iha buska apreensaun ne’e iha indikasaun.

Nia haktuir, iha indisiu ruma ne’ebé dehan katak,  materiál ne’ebé hetan buska ne’e,  iha buat ruma ne’ebé   maka deskonfia, tanba ne’e  parte Ministériu Públiku,  sei halo hela ezame bá laboratóriu  hodi haree  kazu ne’e nia  natureza ne’e saída, mai husi ne’ebé, tanba saída maka involve material  informatiku sira ne’e iha laran.

“UNTL nia sasán hanesan komputedór ita sei fó fila,  maibé sei iha faze investigasaun nia laran,  depois  haree dehan katak ida-ne’e bele fó fila, fó fila, sira ne’ebé maka seidauk fó fila  tanba  sei halo ezame bá laboratóriu,” nia hateten.

Reitór UNTL, João Martins Soares hafoin  reuniaun ho Primeiru-Ministru Kay Rala Xanana Gusmão  iha Palásiu Governu, Tersa (19/08/2925), hateten ba jornalista sira katak, nia parte la satisfás ho  medida Polísia Nasionál Timor-Leste (PNTL) ne’ebé hala’o intervensaun iha kampus universidade nian no  konsidera aktu  ne’e hanesan demaziadu no la presiza.

Autoridade Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK), Kuarta 06 fulan-Agostu 2025, hale’u tuku  09:00 dadeer, halo buska no apreensaun ba Gabinete Reitór, Pro-Reitór ho dirijente sira Departamentu Payroll & Kontabilidade iha Universidade Nasionál Timor Lorosa’e (UNTL) bazeia ba mandadu Tribunál Judisiál Primeiru Instánsia Dili (TJPID) ho Númeru Úniku Krime (NUC) 01 86/25-PNSIK.

Molok ho buska no apreensaun ne’e, autoridade Polísia aprezenta  uluk mandadu husi Tribunál ba Reitór UNTL, João Soares Martins, relativa ho deskonfia ba indísiu krime falsifikasaun dokumentu no anotasaun téknika ne’ebé previstu husi artigu 303° husi kódigu penál Timor-Leste.

Reitór UNTL, João Martins Soares konsidera  prezensa kontinjente polísia ho arma kompletu fó impresaun hanesan UNTL ka nia aan hanesan terrorista.

 “Intervensaun hanesan ne’e la merese. Ami suspira tanba polísia mai ho forsa boot. Ha’u simu karta husi Komandante Jerál Polísia husu deskulpa. Ne’e buat di’ak, maibé ha’u apela atu situasaun hanesan ne’e la bele akontese tan, tanba sei lori trauma bá sosiedade hanesan tempu Indonézia. Ita tenke respeita direitu sidadaun iha nasaun livre,” João Soares Martins hateten.

Reitór UNTL fundamenta katak   to’o agora PNTL seidauk devolve sasán importante hanesan komputadór sira ne’ebé liga ho sistema finansas sentrál UNTL ho nune’e fó impaktu boot ba operasaun akadémika no administrativu.

Nia subliña katak UNTL prontu koopera ho prosesu legál no responsabiliza saida mak akontese, maibé nia konsidera maneira intervensaun polísia hanesan “deznesesáriu.”

Reitór  UNTL informa  PNTL mós   husu deskulpa bá UNTL, tanba rekoñese katak intervensaun ne’e la presiza ho forsa boot.

Iha Kurta loro-kraik,  (06/08/ 2025), órgaun Polísia  halo buska no apreensaun iha rezidénsia  adjuntu reitór UNTL ida nian iha área balun iha Dili laran no konsege rekolla dokumentu relevante sira, inklui  dokumentu karreta marka Ranger númeru matrikula A.16.2xx, motór rua  ho marka Genio númeru matrikula  Y.16.xx TL, Beat N.44.xx TL.

Molok ne’e, iha buska no apreensaun iha arguido sira-nia eskritóriu servisu iha UNTL,  autoridade Polísia sira prende dokumentu relativa inklui prova osan balun.

Lee Mós: Polísia Halo Buska no Apreensaun iha Gabinete Reitór no Pro-Reitór Sira UNTL

Jornalista: Marcelino Tomae