SEFOPE Loke Resjitu Online Vaga Ba Nova Zelándia

Hatutan.com, (08 Setembru 2025), Díli– Sekretáriu Estadu Formasaun Profisionál no Empregu (SEFOPE siglá portugés), Segunda (08/09/2025), ofisialmente loke rejistu online ba kandidatu traballadór Timoroan ne’ebé atu ba servisu iha Nova Zelándia liuhosi Programa Empregadór Seasonal Rekoñesidu (RSE).

Lee Mós: Empregadór Sira husi Japaun ho SEFOPE Diskute Kontratu Mobilidade Laborál

Sekretáriu Estadu Formasaun Profisionál no Empregu (SEFOPE), Rogério Araújo Mendonça, ofislamente lansa rejistu online ba vaga ba Nova Zelándia. Foto/Zita Menezes

Rejistu online ne’e ho durasaun tempu loron haat (4), hahú husi loron 08-12 fulan-Setembru tinan 2025, tanba ne’e, Sekretáriu Estadu Formasaun Profisionál no Empregu (SEFOPE), Rogério Araújo Mendonça, husu bá joven sira atu uza oportunidade ida-ne’e ho di’ak.

“Hatudu ita-boot sira nian abilidade, no hatudu kompeténsia no kualifikasaun, atu nune’e bele responde bá merkadu traballu iha rai Nova Zelándia,” Rogério Araújo Mendonça hateten iha abertura konkutru públiku vaga ba servisu iha Nova Zelándia ne’e.

Sekretária Estadu Formasaun Profisionál Empregu  (SEFOPE) liuhosi Diresaun Nasional Empregu Estranjéiru (DNEE) ho satisfasaun boot hakarak anunsia “Programa Empregadór Seasonal Rekoñesidu (RSE) ne’ebé sei hahú dau-daun ona, hodi oferese oportunidade bá sidadaun Timoroan atu servisu iha setór Agrikultura no Vitikultura Nova Zelándia nian.

Diretór DNEE João Correia Pereira, fundamenta portal aplikasaun online  loke ba loron haat deit, nune’e kandidatu hotu ne’ebé iha interese tenke lee ho kuidadu rekizitu elijibilidade no prepara dokumentu sira ne’ebé presiza  molok atu rejista bá aplikasaun ne’e rasik.

Nia afirma Programa Empregador Sazonal Rekoñesidu (Recognised Seasonal Employer RSE) bá Nova Zelandia, ida-ne’e estabelese atu fó apoiu ba  nesesidade traballadór sazonal sira iha indústria Ortikultura no Vitikultura, Nova Zelaádia nian, enkuantu mós fornese oportunidade empregu temporáriu bá traballadór sira hosi nasaun parseiru illa Pasifiku sira no mós Timor- Leste.

SEFOPE  enkoraja tebes aplikante sira  atu lee didi’ak informasaun no rekizitu sira hotu molok hahú aplika  vaga online refere. Durasaun empregu,  tuir Programa RSE nian bá fulan-neen to’o hitu. Hafoin kompleta períodu ida-ne’e, traballadór tenke fila mai Timor-Leste maizumenus durante fulan-haat (4) molok elizivel bá kontratu seluk mobilizasaun tuir mai.

Kondisaun Importante Sira Bá Aplikasaun Online Programa RSE;

• Nasionalidade tenke sidadaun Timorens
• Idade bá aplikante sira tenke ho idade tinan 21 bá leten.
• Profisiénsia Inglés tenke  lisensiatura/Diploma Inglés ka sertifikadu Lian Inglés.

Dokumentu sira ne’ebé presiza maka hanesan;

• Dokumentu hotu-hotu tenki submete (upload) ho versaun dokumentu iha PDF no koloridu
• Pasaporte: Ita-bo’ot nia pasaporte tenki válidu pelumenus fulan neen ba leten
• Sertifikadu Rejistu Kiriminal ne’ebé validu (ho versaun Lian Inglés)
• Sertifikadu Lian Inglés / Diploma
• Kartaun Evidensia husi SEFOPE
• Billete Identidade (BI)
• Kartaun Eleitoral (KE)
• Sertifikadu Vasinasaun COVID-19
• Sertidaun RDTL (Birth Certificate)
• Foto Perfil Kompletu (whole body/isin lolon tomak)

Kondisaun Servisu nian servisu limita bá ortikultura no vitikultura de’it. Laiha tipu empregu seluk ne’ebé maka permite tuir vistu RSE ne’e.

Oras servisu nian, minimu oras 30 iha kada semana, ka oras 30 média kada semana durante semana haat; oras 120 kada fulan. Remunerasaun taxa saláriu atuál bá traballadór RSE sira nia minimu maka NZD $23.15 kada oras.

Jornalista : Zita Menezes