Fundu Mina-rai Tenke Fó Benefisiu Bá Jerasaun Sira

Hatutan.com, (11 Setembru 2025), Díli– Sekretáriu Jerál Partidu FRETILIN,  Mari Alkatiri, hateten fundu mina-rai tenke fó benefisiu bá jerasaun bá jerasaun liuhosi investe iha setór edukasaun, saúde  no ekonomia.

Lideransa Partidu FRETILIN sira halo konférensia imprensa iha CCF, Kinta (11/09/2025). Foto/Zita Menezes

“Ha’u dehan fundu mina-rai tenke fó benefisiu bá jerasaun bá jerasaun, ha’u hateten kedan sé uluk sei membru Governu balu sei iha ne’e, ha’u dehan dollar ida sai husi fundu mina-rai, tenke iha retornu, retornu ne’e iha saida iha longu prazu, investe iha setór edukasaun, investe iha setór  Saúde, investe iha ekonomia ida sustentavél, ida-ne’e maka la akontese,” Mari Alkatiri  hateten bá jornalista sira liuhosi konférensia imprensa iha  sede Komite Sentrál FRETILIN (CCF), Comoro,  Díli, Kinta (11/09/2025).

Nia hateten, lei difine kedan 3% despeza rekorente, ne’e Governu nian direitu, la’ós dehan Governu labele hasai tán husi fundu mina-rai, bele hasai, maibé tenke iha investimentu no retornu, investimentu retornu iha tempu naruk maka edukasaun no saúde.

“Tempu badak maka ekonomia, ekonomia ita laiha, sé ekonomia ita iha ne’e ekonomia sosa nian de’it, hotu-hotu mai husi liur supermi to’o saida mai hotu husi liur. Ekonomia sosa nian signifika katak osan ne’e la investe,” Alkatiri tenik.

Mari Alkatiri hatutan tán katak “osan ne’e ninian efeitu bá multiplikadór bá trabaladór sira husi rai-li’ur la’ós ita nian, osan ne’e haburas ekonomia trabaladór husi rai-li’ur la’ós ita nian, tanba ita sosa husi ne’ebá maka mai, ne’e maka akontese durante tinan 20 resin.”

Jornalista : Zita Menezes