Malázia Kompromete Apoiu no Hametin Kooperasaun Bilaterál ho Timor-Leste

Hatutan.com, (24 Setembru 2025), Díli—Primeiru-Ministru Malázia, Dato‘ Seri Anwar Bin Ibrahim hateten Malázia iha kompromisu atu kontinua apoiu no hametin kooperasaun ho  Timor-Leste, liuliu iha Timor-Leste  nia esforsu atu adere bá ASEAN  iha fulan-Outubru, tinan ne’e.

Lee Mós: Lansa Ona Fatuk Dahuluk bá Projetu Sentru Konvensaun Internasionál Timor-Leste iha Antigu Portu Dili

PR José Ramos-Horta kondekora PM Anwar Ibrahim ho medalla “Grande Colla Ordem Timor-Leste”. Foto/Atan Lemos

“Ami diskute mekanizmu sira atu hasa’e relasaun bilaterál sira, inklui investimentu sira iha komérsiu, turizmu, edukasaun, saúde no enerjia,” PM Anwar Ibrahim hateten iha nia diskursu iha ambitu enkontru bilateral ho Primeiru-Ministru Xanana Gusmão iha Palásiu Governu, Dili, Kuarta (24/09/2025).

Iha ámbitu ASEAN nian, PM Anwar Ibrahim hateten, Timor-Leste halo ona buat hotu ne’ebé nia bele hodi aselera prosesu ne’e  no Malázia sente onradu hodi simu serimónia adezaun ofisiál Timor-Leste nia adezaun bá ASEAN.

Primeiru-Ministru Malázia ne’e subliña mós nível konfiansa másimu entre nasaun rua ne’e, inklui iha aspetu relasaun mútua, defeza, akizisaun, formasaun no fahe informasaun.

Biban ne’e, Primeiru-Ministru (PM), Kay Rala Xanana Gusmão hateten Malázia ho Timor-Leste hametin kooperasaun iha área oioin, nomeadamente iha komérsiu, investimentu, ensinu superiór, saúde, kapasitasaun no turizmu bá benefísiu mútua povu nian.

PM Xanana Gusmão konsidera vizita ofisiál PM Anawar Ibrahim ne’e nu’udár marku importante ida iha amizade entre Timor-Leste ho Malázia, ne’ebé buras beibeik dezde estabelesimentu relasaun diplomátika iha tinan 2002.

“Ami-nia diskusaun sira ohin nian manas no produtivu. Ami konkorda atu aprofunda liután ami-nia relasaun bilaterál sira iha seitór oioin, inklui komérsiu no investimentu, ensinu superiór, saúde no turizmu,” PM Xanana hateten.

Nia haktuir, ida-ne’e refleta konfiansa polítika ne’ebé maka’as hosi nasaun rua nian no kompromisu konjunta ne’ebé fahe bá involvimentu kle’an liu.

PM Xanana rekoñese papél edukasaun no formasaun nian hodi prepara foin-sa’e sira bá futuru, hodi konkorda kona-bá programa foun, bolsa estudu no parseria entre instituisaun sira.

“Ha’u hato’o agradesimentu kle’an Timor-Leste nian bá Primeiru-Ministru Anwar Ibrahim bá ninia apoiu maka’as no metin. Iha importánsia partikulár bá ita katak ita sai membru ASEAN nian iha Simeira tuirmai iha fulan-Outubru, iha nia prezidénsia nia okos. Ami rekoñese importánsia hosi Timor-Leste nia adezaun bá ASEAN durante Malázia nia mandatu nu’udár prezidente. Malázia nia apoiu ne’ebé la nakdoko sei la haluha hosi ita nia povu,” Xanana Gusmão hateten.

Líder na’in-rua mós troka hanoin kona-bá asuntu rejionál no globál sira. Iha Myanmar, nasaun rua ne’e re-afirma importánsia unidade ASEAN no Konsensu Pontu Lima nu’udár baze bá progresu bá pás no demokrasia.

Kona-bá Palestina, parte rua fahe lian hanesan hodi husu atu hapara violénsia, respeitu bá lei internasionál, no solusaun justa ida ne’ebé rekoñese povu Palestina nia direitu bá autodeterminasaun.

Jornalista: Marcelino Tomae