Raul Lemos-Krisdayanti Promove Turizmu Timor-Leste Liu Husi Múzika

Hatutan.com,  (26 Setembru 2025), Díli– Emprezáriu Timor-oan Raul-Lemos hamutuk ho nia kaben diva pop Indonézia Krisdayanti ka KD no ho oan doben Amora Lemos sei kolabora ho artista Timor-oan; Ataide ho Zeffsom Soares no grupu dansa kultura Le-Ziavál, sei aprezenta “Múzika Tebe-Tebe” ho múzika Pop ida hodi kontribui promove poténsia turizmu Timor-Leste ba rai-li’ur (diaspora).

Lee Mós: Raul Lemos ho Nia Família Hamutuk ho Le-Ziavál Promove Kultura Timor

Raul Lemos ho Krisdayanti hamutuk ho oan na’in-rua no grupu dansa Le-Ziavál hasoru malu ho Prezidente Repúblika, José Ramos-Horta iha Palásiu Prezidensiál, Sesta (26/09/2025). Foto/Marcelino Tomae

Iha múzika “tebe-tebe”  ne’ebé sei kanta husi Krisdayanti, Amora, Deo Ataide ho Zeffsom,  konsidera epizódiu espesiál ne’e dedika liubá promove beleza no fatin sira furak iha Timor-Leste iha vídeo klip ne’ebé sei lansa iha fulan-Novembru, tinan ida-ne’e. 

Ho konseitu múzika “tebe-tebe” no múzuka pop iha lian Tetun ne’ebé sei hananu husi Krisdayanti ho oan-doben Amora Lemos ne’e, Sesta (26/09/2025),  Raul Lemos aprezenta ideia ne’e ba Prezidente Repúblika, José Ramos-Horta iha Palásiu Prezidensiál.

Hafoin hasoru malu ho Prezidente Repúblika José Ramos-Horta, CEO empreza Raya Media & Entertainment  no ATRAMOR SUCESSO ne’e haktuir ba jornalista sira katak nia ho família  mai ho ekipa boot kompostu husi ema kuaze na’in-30 hasoru Prezidente Repúblika, José Ramos-Horta hodi introdús idea balu atu hasai ka foti vídeo klip  iha fatin sira turizmu Timor-Leste nian nu’udár parte ida kontribui hodi promove potensia turizmu Timor-Leste nian ba mundu.

Fatin turizmu ne’ebé indikadu atu foti vídeo klip ba múzika “Tebe-Tebe” no múzika pop Krisdayanti-Amora Lemos maka hanesan  Kristu Liurai, área Branka, Palásiu Nobre-Lahane, Kampal misa Santu Padre João Paulo II ho kampal misa Santu Padre Francisco iha Tasi-Tolu, ho mós fatin turistiku sira seluk hanesan  iha Atáuro ho Rabilau-Maubisse.

Família Raul Lemos-Krisdayanti hasoru malu ho Prezidente Repúblika, José Ramos-Horta.

“Ami mai hasoru Prezidente  Repúblika ne’e atu husu nia ideia  hanesan Timor- oan hanoin atu kontribui  ba ita-nia dezenvolvimentu  nasionál iha área promove  turizmu Timor-Leste.  Ami prepara múzika Timor  nian rua;   tebe-tebe ho múzika pop  no  ami  husu mós ideia bá Prezidente atu halo vídeo klip hodi foti  husi angúlu ita-nia kultura, tradisionál no beleza hodi esplora sai  bá iha li’ur  nune’e ema  mundu  bele koñese Timor liuhosi vídeo klip múzika Tebe-tebe ho pop ne’ebé sei hananu husi ha’u nia kaben Krisdayanti no ami nia oan Amora Lemos,”  Raul hateten.

Inisiativa ne’e  la’ós de’it pretende fó espasu bá  artista lokál, maibé mós  fó kontribuisaun bá  dezenvolvimentu turizmu  rai-laran, hodi  bele fó imajen fresku  Timor nian bá  mundu.

Raul Lemos esplika, ideia ida-ne’e la’ós de’it atu  kanta, maibé mós atu fó kontribuisaun ba turizmu. Tanba ne’e vídeo klip ba múzika rua ne’e sei kombina mós ho apa-ama sira iha Rabilau-Maubisse hodi hatais vistura tais ne’ebé reprezenta orgulu boot tradisaun no kultura Timor-Leste nian iha mundu.

Nia afirma, mézmu Timor-Leste ne’e nasaun ki’ik, maibé  dezenvolvimentu komesa la’o dadauk ona, hanesan parte infraestrutura turizmu nian no kultura sira ne’e la’o.

“Inan-aman sira  iha Rabilau  ami sei  organiza sira hodi hatais  tais,  hodi halo vídei klip bá múzika “Tebe-tebe”, dansa ka dahur  tuir Timor nia  tradisaun  ka Timor nia toman sira.

Prezidente Repúblika, José Ramos-Horta ho ksolok simu audésia ho família Raul Lemos.

Hanesan Timor-oan família Raul Lemos hakarak kontribui ativu ba promosaun boot  setór turizmu iha Timor-Leste tanba turizmu ne’e la’ós atu bá ko’alia bá ema katak rai-boot sira katak Timor-Leste iha tasi di’ak,  iha foho di’ak, maibé  tenke promove liuhosi múzika no dansa kultura sira ne’e hodi ema bele haree.

“Ita atu  Promove ne’e ita tenke halo buat ruma para sira haree katak  ohh Timor  nia tasi di’ak duni, Timor nia foho furak duni, sira nia tradisaun  no kultura ne’e úniku no hatudu timor sai uniku iha mundu,” Raul Lemos hateten.

Vídeo klip ne’ebé sei foti iha múzika “tebe-tebe” no múzika pop ho lian Tetun ne’e sei publika iha plataforma sira ne’ebé eziste iha mundu dijitál hanesan iha YouTube no tua mós iha Spotify for Artists (Spotify ba Artista) iha Estadus Unidus Amérika.

Spotify ba Artista sira maka plataforma gratuita ida iha ne’ebé artista sira no jestór sira bele jere sira nia perfil, promove sira nia múzika, hatama knananuk sira ba lista reprodusaun editoriál no utilizadór sira, no asesu ba estatístika detalladu sira kona-ba sira nia rona-na’in no dezempeñu iha plataforma.

Prezidente Repúblika, José Ramos-Horta,  apresia no  apoiu tebes ideia brilliante família Raul Lemos no enkonraza atu promove sitiu turistiku hotu-hotu ne’ebé eziste iha Timor-Leste.

“Ein-prinsípiu Prezidente apoiu  ami nia planu ne’e no Prezidente Repúblika fó mós ideia katak, karik loron seluk  bele foti mósparte hotu-hotu potensia sira turizmu Timor-Leste nian,” Rau-Lemos haktuir.

Na’in bá Raya Media and Entertainment no  Hatutan.com ne’e mós hanoin ona katak, bá futuru sei harii estúdiu rasik iha Timor, hanesan mós ho estúdiu sira iha rai-liur, atu nune’e artista Timor-oan sira sai kreativu no badinas halo múzika.

Jornalista: Marcelino Tomae