Tribunál Hahú Re-julgamentu Bá Kazu Matebian Zizelma

Hatutan.com, (03 Outubru 2025), Díli–  Tribunál Judisiál Primeira Instánsia Díli (TJPID), Sesta (03/10/2025),  hahú  halo re-julgamentu bá kazu  Zizelma Maria de Fatima Verdial Gonçalves nia mate.

Lee Mós: Tribunál Rekursu Deside Halo Re-julgamentu Bá Kazu Zizelma Nia Mate

Matebian Zizelma Maria de Fatima Verdial Gonçalves. Foto/Espesiál

Proseseu Asistente bá vitíma hosi Matebian Zizelma Maria de Fatima Verdial Gonçalves, Defensor Públiku Estáquio Guterres, husu tribunál hodi  avansa bá re-julgamentu. Nune’e, Tribunál mós aseita  prosede  bá re-julgamentu, maibé tenke arolla  testamuñia na’in rua.

Defensór Públiku Estáquio Guterres aprezenta sasin na’in rua maka hanesan Nélia Maria de Doloroza de Araújo no Domingos Sousa. Ho nune’e, tribunál hatun despaisu  hodi aprova bá sasin sira  hosi vitíma nian, tanba ne’e arguidu tenke fó informasaun antes deside advogadu foun.

Defensor Públiku Estáquio Guterres  husu mós bá tribunál atu konfirma ho arguidu, maibé tribunál husu arguidu mantein ho solusaun. Nune’e, Asistente mós husu pedidu  bá  tribunál atu hatun despaisu ida hodi atu rona polísia sira ne’ebé  maka  atende asidente ne’e iha momentu ne’ebá.

Durante re-julgamentu ne’e Asistente  husu tribunál  atu suspende re-julgamentu minutu tolu hodi konfirma sasin sira.

Hafoin suspende  minutu tolu, Asistente hosi vitíma,  aprezenta faktu foun kona-bá CCTV ne’ebé grava iha loja Funan Buras no Toto Bola  iha área Delta.

Tribunál   hatun despaisu atu husu Loja Funan Buras no  Toto Bola iha área Delta  hodi asegura vídeo ne’ebé grava hosi CCTV.

Tribunál konfirma arguidu MSDC,  maibé arguidu hili nonok de’it lakohi fó komentáriu.

Sasin Nélia Maria de Araújo deklara  bá  tribunál katak nia koñese Matebian Zizelma hanesan nia prima rasik no iha  loron 13 fulan-Marsu  tinan 2025 mosu asidente   iha tuku 08:30 dadeer Otl, tamba antes ne’e matebian Zizelma bá vizita sasin Nélia.

Sasin Nélia konta kronolojia katak, hafoin vizita ne’e, matebian komprimenta nia tian Nélia katak atu fila bá uma iha Delta.

“Depois nia (Zizelma) atu fila bá uma  maka ha’u rona derrepente  tarrutu, ha’u sai bá ha’u nia prima latan hela iha estrada klaran,”  Vitíma konta.

Nia deklara bá tribunál katak Matebian Zizelma sai husi nia uma la to’o minutu ida,  maibé  sasin ne’e la imajina katak Zizelma maka hetan asidente, nune’e sasin Nélia hakat bá fatin asidente distansia ho nia uma kuaze  metru 40.

“Ha’u sai bá ha’u haee nia latan hela iha estrada, ha’u bolu Zima, Zima, Zima,  maibé ha’u  nia prima la hatan,  no la book aan.”

Nélia hakbeisk bá Zizelma ne’ebé latan iha  hela iha estrada klaran, no hasai telefone hosi matebian nia bolsu maka hetan raan sulin bá estrada. Nune’e sasin husu ajuda bá mana ida hodi tula vitíma asidente bá Sentru saúde Kampu Barru, Comorro.

Sasin Nélia haktuir, momentu ne’ebá kedas  matebian Zizelma nia maun to’o kedas sentru Saúde Kampu Baru,  maka  médiku sira transfere bá Ospitál Nasionál Guidu Valadares (HNGV).

Nia konta tan,  matebian Zizelma ulltrapasa zebra cross maibé asidente ne’e dook uituan  kauza metru  tolu husi zebra cross.

“Asidente ne’e ha’u la haree ho matan, maibé haree  vídeo ne’ebé CCTV ne’e ha’u nia prima hakat duni liuhosi zebra cross,” nia hateten.

Fó hanoin fali katak, matebian Zizlema Maria Fatima Verdial Gonçalves soke  ho motór ne’ebé kondús hosi arguidu MSDC no iha prosesu justisa ne’ebé hala’o husi Tribunál Judisiál Primeira Instánsia Díli iha loron  18 fulan-Marsu 2025   hatun ona  despaisu  hodi aplika pena  tinan tolu,  suspende tinan haat bá arguidu MSDC.

Iha asidente trafegu ne’e rezulta matebian Zizelma Maria Fatima Verdial Gonçalves hakotu iis nune’e ho asidente trafegu ne’e polísia detein kedan suspeitu MSDC iha sela detensaun oras 72.

Iha prosesu  sumariu, Juiz titular José Gonçalves deside aplika pena prizaun tinan tolu suspende ba tinan haat ba arguidu MSDC no selu indenminizasaun sivil ba danu patrimonial ba  vitima Zizelma Maria Fatima Verdial Gonsalves nia familia ho valor $5000.

Ho desizaun Tribunál nia ne’e, mosu dezentedimentu  entre família vitima no arguidu sira iha resintu Tribunál Judisiál Primeira Instánsia Díli (TJPID) tamba familia vitima la satisfeitu ho desizaun Tribunál nian to’o rezulta arguidu MSDC nia feton hetan pankada grave tamba ema baku ho helem to’o monu fatin.

Re-julgamentu ne’e prezide hosi Juis Singular  José Gonçalves, Ministériu Públiku  Reprezenta hosi Prokuradór Rafael Gusmão  Vitíma hetan asistente hosi Defensor Públiku Estáquio Guterres.

 Jornalista: Marcelino Tomae