JSMP Parabeniza MP Loke Prosesu Ba Kazu Projetu Fornesimentu Kobustivel ho Servisu Manutensaun Karreta RTTL,E.P

Hatutan.com, (07 Outubru 2025),Díli—Organizasaun noun Governamentál (ONG) Programa Monitorizasaun Sistema Judisiáriu (JSPM-sigla inglés) fó parabeniza ba servisu Ministériu Públiku (MP) ne’ebé loke ona prosesu ba kazu projetu fornsesimentu kombustivel no servisu manutensaun karreta bá iha Rádiu Televizaun Timor-Leste Empreza Públiku (RTTL,E.P).

Lee Mós: AJAR Ezije MP Aselera Kazu Projetu Fornesimentu Kombustivel no Manutensaun Karreta RTTL,E.P

Jornalista Hatutan.com, Marcelino Tomae halo entrevista ho Peskizadór legál JSMP Lúis Oliveira Sampaio. Foto/Dok

Peskizadór legál  JSMP, Luís de Oliveira Sampaio hateten, saida maka Ministériu Públiku (MP) halo hodi notifika dirijente sira RTTL,E.P, inklui prezidente konsellu administrasaun RTTL,E.P, Elizeiu Isaac Fernandes   hanesan resposta emidiatu ba preokupasaun Públiku ne’ebé  divulga    média Hatutan.com   kona-bá  kazu fornesimentu kombustivel no servisu manutensaun karreta bá RTTL,E.P ne’ebé deskonfia abuzu poder, korrupsaun no hamosu prezuiju bá Estadu.

“JSMP fó parabéns bá Ministériu Públiku tanba  sensivél ho preokupasaun públiku, liu-liu hola medida ho emidiatu atu hatán bá faktu sira ne’ebé Hatutan.com divulga, ka fó sai hodi loke prosesu atu priénxe kazu ne’e nia indikasaun bazeia ba alegasaun sira ne’ebé iha,” antigu adjuntu komisáriu Komisaun Anti-Korrupsaun (CAC) Luís de Oliveira Sampaio hateten bá Hatutan.com, Tersa (07/10/2025).

Nia   hatutan, pasu nesesáriu duni, saída maka Ministériu Públiku  halo ne’e, apropriadu tebes, tanba   atua kedas, sira maka notifika no investiga rasik, tanba elementu ne’ebé envolidu iha  Komisaun Anti-Korrupsaun,  sira  ne’e iha ligasaun ho partidu.

Tuir   nia katak,   la nesesáriu atu Ministériu Públiku  haruka bá CAC tanba CAC nia ema ne’e  liu-liu komisáriu sira ne’e mesak ema partidu hotu de’it, ne’ebé sáida maka Ministériu Públiku halo ne’e pertenente tebes.

Nia  husu bá Ministériu Públiku liu-liu prokuradór tutelár sira ne’ebé  hetan delegasaun atu investiga Prezidente Konsellu Administrasaun RTTL,E.P, Elizeu Isaac Ferndades ho direjente sira, ténke halibur informasaun relevante sira, faktu  sira oinsá atu forma sira nia konviksaun.

Nia esplika, Ministériu Públiku, tenke haree didi’ak faktu no indisiu sira ne’e, lori  bá krime, partisipasaun ekonómia,  konflitu interese,  abuzu bá podér, ne’ebé  konsagra ona iha lei medida prevensaun no kombate korrupsaun.

Nia subliña, notifikasaun ne’e faze inisiál ida atu halibur informasaun sira iha lideransa RTTL,E.P nian ho nia ekipa sira,  kona-bá projetu fornesimentu kombustives no manutensaun karreta iha RTTL,E.P.

Luís de Oliveira Sampaio husu bá Ministériu Públiku atu lidera invetigasaun  kazu projetu fornesimentu kombustivél no manutensaun karreta to’o prosesu ne’e remata iha tirbunál.

“Buat ne’ebé ami kestiona tinan barak ona maka, banhira komisáriu sira-ne’ebé mak tuur iha institusaun hanesan CAC maka ema ne’ebé mai hosi partidu ne’e dezafiu boot atu prevene no kombate korrupsaun tanba iha relasaun ba malu, entaun susar atu investiga sira nia ema rasik” nia hateten.

Nia dehan,  tamba prosesu ne’e ténke haree  legalmente, haree ho sériu tamba kestaun kona-bá prinsípiu legalidade, efeitu legál ne’ebé presiza ema hotu haree.

Antigu adjuntu CAC ne’e konsidera atuasaun Ministériu Públiku bá kazu projetu fornesimentu kobustivél no manutensaun karreta iha RTTL,E.P, tuir dalan loos, no dalan di’ak ne’ebé hatuur ona lei.

“Buat ida  ita presiza tane aas maka prejunsaun inosénsia, katak bainhira seidauk iha prosesu julgamentu ita la  bele duun bá ema ne’e  katak, ema ne’e korruptór ka halo korrupsaun, ida-ne’e foin indikasaun ,” nia hateten.

Nia  husu bá Ministériu Públiku atu halo investigasaun kle’an, bá kazu projetu  fornesimentu kombustivél no manutensuan karreta, iha RTTL,E.P, atu nune’e  bele hanorin mós bá institusaun sira seluk.

Prosesu bá kazu ne’e,  Prezidente   Konsellu Administrativu Rádiu Televizaun Timor-Leste, Empreza Públiku, (RTTL,E.P), Eliziu Isaac Fernandes, sai arguidu ba kazu projetu fornesimentu  kombustivel no servisu manutensaun karreta iha RTTL,E.P.

Elizeu Isaac Fernandes, simu pose hanesan Prezidente Konsellu Administrasaun RTTL,E.P iha loron 13 fulan-Marsu 2025. Nune’e, to’o fulan-Outubru ne’e, nia foin assume knar ne’e ho tempu fulan-neen (6)  liu loron-20-resin.

Informasaun ne’ebé Hatutan.com  asesu  hosi fonte iha Ministériu Públiku (MP) haktuir  katak  Prezidente RTTL,E.P Eliziu Isaac  Fernandes, Sesta (03/10/2025), ba hatan ona iha MP ba kazu   ho NUK: 0015/25.CACTL kona-bá  fornesimentu kombustivel no servisu manutensaun karreta iha RTTL, E.P ne’ebé deskonfia abuzu poder, korrupsaun no hamosu prezuiju bá Estadu.

Prezidente Konsellu Administrasaun RTTL,EP, Eliziu Isaac Fernandes ho nia ekipa dirijente sira RTTL,E.P to’o iha Edifísiu Ministériu Públiku  iha tuku 8:30 dadeer Otl,  hodi kumpri notifikasaun hosi  Ministériu Públiku ho NUK: 0015/25.CACTL.

Iha Kuarta (01/10/2025), dirijente RTTL,E.P na’in-lima, kompostu husi na’in-rua presta deklarasaun iha parte dadeer no na’in-tolu seluk mai presta deklarasaun iha parte loraik iha MP relativa mós ho kazu projetu servisu fornesimentu kombustivel ho servisu manutensaun karreta nian.

Sira hirak ne’ebé ba presta deklarasaun iha MP ona ne’e mak hanesan Azinho Matus Fernandes, nu’udár Xefe Departamentu Aprovizionamentu, Noviana de Fátima Nahak, eis-diretóra Nasionál Administrasaun no Finansas RTTL,E.P, ho membru ekipa juri ba konkursu projetu servisu fornesimentu kombustivel ho servisu manutensaun karreta RTTL,E.P  nian mak hanesan, Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri).

Fó hanoin fila katak Prezidente Konsellu Administrasaun Rádiu Televizaun Timor-Leste, Empreza Públiku (RTTL,E.P), Elizeu Isaac Fernandes, deskonfia halo abuzu podér no hamosu prejuízu ba Estadu iha foti desizaun ba projetu  servisu fornesimentu kombustivel ho servisu manutensaun karreta iha RTTL,E.P.

Prezidente Konsellu Administrasaun RTTL,E.P, Elizeu Isaac Fernandes, uza nia kompeténsia hodi hatún despaxu fó projetu servisu fornesimentu kombustivel ho servisu manutensaun karreta ba kompañia rua (2) ne’ebé la prienxe rekizitu iha selesaun dokumentu no aprezenta presu boot ka la razoavel.

Tuir dokumentu  relatóriu avaliasaun servisu fornesimentu kombustivel ho klasifikasaun importante no númeru referénsia 07/Ekipa Juri/RTTL,E.P/IV/2025 ne’ebe    Hatutan.com  asesu hatudu, katak ekipa juri ho nia kompozisaun hanesan Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru iha loron 25 fulan-Abríl 2025, deside  kompañia Aitula Fuel’s Unipessoal, Lda, hodi fornese kombustivel ba RTTL,E.P ho razaun presu razoavel no dokumentu ne’ebé kompañia submete kompletu tuir duni rekizitu ne’ebé RTTL,E.P mensiona.

Tabela avaliasaun dokumentu ba projetu servisu fornesimentu kombustivel ho nia kustu ka presu $40,000.00, hatudu kompañia Aitula Fuel’s Unipessoal, Lda hetan valor 130 no aprezenta montante orsamentu ki’ik $34,39 kompara ho kompañia Mãe da Graça Unipessoal, Lda, ne’ebé prezidente  Konsellu Administrativu RTTL,E.P, Elizeu Isaac Fernandes, indika hodi manan fali servisu fornesimentu kombustivel ba RTTL,E.P ho kustu $35,78 no hetan valor iha avaliasaun dokumentu 115 de’it.

Iha dokumentu karta akompañamentu ne’ebé Diretora Nasionál Administrasaun no Finansas RTTL,E.P, Noviana de Fátima Nahak, asina iha loron 29 fulan-Abríl 2025, hato’o ba Diretór Ezekutivu RTTL,E.P, João Guterres da Silva, reiteira tan katak bazeia ba rezultadu enkontru ekipa juri iha loron 25 fulan-Abríl 2025, hodi foti desizaun ba servisu fornesimentu kombustivel deside ba Aitula Fuel’s Unipessoal, Lda mak sai nu’udár manan na’in, ho razaun presu ne’ebé razoavel no dokumentu ne’ebé kompañia submete ho kompletu.

Iha fali loron 30 fulan-Abríl 2025, Diretór Ezekutivu RTTL,E.P, João Guterres da Silva, hato’o pedidu aprovasaun relatóriu avaliasaun servisu fornesimentu kombustivel ho númeru referénsia 31/D.E/RTTL,E.P/IV/2025, ba Prezidente Konsellu Administrasaun RTTL,E.P, Elizeu Isaac Fernandes,  atu aprova pedidu relatóriu avaliasaun servisu fornesimentu kombustivel.

Iha loron 13 fulan-Maiu 2025, Prezente Konsellu Administrasaun RTTL,E.P, Elizeu Isaac Fernandes,  hatún despaxu husu favor Diresaun Nasionál Administrasaun no Finansas (DNAF) trata asuntu ne’e fó oportunidade ba kompañia Mãe da Graça Unipessoal, Lda, ho razaun iha esperiénsia servisu hamutuk ne’ebé ho kometimentu ba servisu kualkér tempu.

Iha fali dokumentu seluk kona-bá servisu fornesimentu manutensaun karreta RTTL,E.P nian ho montante orsamentu $20,000.00, ekipa juri ho nia kompozisaun  juri mak hanesan, Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru hodi foti desizaun ba servisu fornesimentu manutensaun ba karreta  deside ba kompañia Fe Loog Unipessoal, Lda hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete ho kompletu tuir rekizitu ne’ebé RTTL,E.P husu.

Iha avaliasaun dokumentu ba projetu fornesimentu manutensaun ba karreta RTTL,E.P, kompañia Fe Loog Unipessoal, Lda hetan valor 130 no kompañia Fastep, Lda ne’ebé Prezidente RTTL,E.P Elizeu Isaac Fernandes, indika hetan de’it valor 110 tanba rekizitu sira hanesan TIN laiha no estatutu kompañia nian laiha.

Iha loron 29 fulan-Abríl 2025, Diretora Nasionál Administrasaun no Finansas RTTL,E.P, Noviana de Fátima Nahak submete karta akompañamentu ba Diretór Ezekutivu RTTL,E.P, João Guterres da Silva, ho númeru referénsia 98/DNAF-RTTL,EP/IV/2025, hodi solisita ba Diretór Ezekutivu RTTL,E.P, João Guterres da Silva,  atu bele hetan aprovasaun ba relatóriu ida ne’ebé ekipa juri deside kompañia Fe Loog Unipessoal, Lda maka manan hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete kompletu.

Iha loron 13 fulan-Maiu 2025, prezidente RTTL,E.P, Elizeu Isaac Fernandes hatún despaxu husu favor ba DNAF atu trata asuntu ne’e no fó oportunidade ba kompañia Fastep, Lda tanba bazeia ba esperiénsia servisu hamutuk  ne’ebé profisionál no prontu ba RTTL (……)

Jornalista: Marcelino Tomae