Tribunál Aplika Medida Aprezentasaun Periódika ba Membru PNTL Tiru Nia Kaben

Hatutan.com, (14 Outubru 2025), Díli-Tribunál Judisiál Primeira Instánsia Díli (TJPID), Tersa (14/10/2025), hala’o primeira interogatóriu ba membru Polísia Nasionál Timor-Leste (PNTL)  ho inisiál JLO ne’ebé   tiru tohar nia kaben  nia ain.

Lee Mós: Membru PNTL Tiru Nia Fen Detein iha Sela Hodi Submete Prosesu Kriminál no Disiplinár

Membru PNTL ho inisiál JLO ne’ebé tiru nia kaben partisipa iha primeiru interogatóriu iha TJPID, Tersa (14/10/2025). Foto/: Juvinal Cabral dos Santos

Iha   audénsia primeira interogatóriu ne’e Tribunál aplika medida koasaun aprezentasaun periódika kada semana iha Komandu Jerál PNTL ba arguidu JLO ne’ebé ho diviza Superintendente-Xefe Polísia ne’e.

Membru PNTL ne’ebé sai arguidu ba kazu tiru nia kaben ne’ebé ho kondisaun isin-rua ne’e, to’o iha resintu TJPID hale’u tuku 14:15 Otl hodi tuir prosesu  primeiru interogatóriu ne’ebé preside husi Juiza Jumiati Freitas.

Defensór Públiku, Estaquio Guterres  hateten, iha despaixu tribunál nian  hatun ba arguidu ho medida kaosaun aprenzetasaun periódika, ne’ebé mak kada semana tenke aprenzenta aan ba iha komandu jerál PNTL.

Estaquio Guterres  dehan iha alegasaun Ministériu Públiku mós  husu medida koasaun aprezentasaun periódika,  tanba arguidu hanesan membru polísia ida ativu hela, nune’e mós parte defeza  konkorda ho medida ne’e rasik.

“MP husu ba tribunal mos atu aplika medida koasaun aprezentasaun periódika, tanba  nia hanesan membru ne’ebé ativu hela, tanba nia rasik la perigu ida nia hases  aan husi investigasaun, la perigu mós nia halo kontinuasaun ba krime ne’ebé nia halo, tantu defeza mós aseita ho medida koasaun hodi aprezenta aan ba iha komandu jerál  PNTL atu nune’e komandu bele kontrola liután, nune’e bele investiga prosesu ne’e la’o lalais,”  Estaquio Guterres   hateten.

Nia esplika medida koasaun ne’ebé tribunál aplika  ba aguidu, tanba tribunál haree katak aktu ne’ebé mak arguidu halo ne’e sei deskonfia hela.

Defensor Públiku ne’e dehan, kona-ba arma sira ne’ebé mak arguidu utiliza, Ministériu públiku husu tribunál atu devovle fila fali ba iha  komandu jerál PNTL.

Iha prosesu primeiru Interogatóriu,  ne’e Ministériu Públiku, akuza arguidu ho krime ofensas integridade fízika grave  iha artigu 146 tuir kodigu penál Timor-Leste.

Jornalista: Juvinal Cabral dos Santos