Governu VS Lighthouse, Sosiedade Sivíl Husu PM Xanana La Bele Luta Mesak

Hatutan.com, (27 Outubru 2025), Díli— Sosiedade Sivíl liuhosi asosiasaun HAK  husu Primeiru-Ministru (PM) Kay Rala Xanana Gusmão, atu la bele esforsu mesak  bá kazu disputa ne’ebé akontese dezde  tinan 2010 liubá  entre Governu Timor-Leste ho empreza internasionál Lighthouse Corporation Pty Ltd.

Lee Mós: Governu Timor-Leste VS Empreza Lighthouse, Xanana Sei Responde iha Tribunál Supremu Victória

Diretór Asosiasaun HAK, Feliciano da Costa   Araújo. Foto/Dok

Diretór Ezekutivu Asosiasaun HAK,  Feleciano da Costa Araújo  bá Hatutan.com  iha nia  kna’ar fatin, Faról Díli, Segunda (27/10 2025) hateten,   Primeiru-Ministru Kay Rala Xanana Gusmão  iha   kapabilidade  oinsá maka atu hatán bá prosesu  ne’e iha Trbiunál Supremu  Victória-Austrália.

“Agora hanesan sosiedade sivíl, ami fó hanoin de’it, onsá péritu sira  ka ema sira-ne’ebé maka defensór bá lia-loos  ka advogadu sira-ne’e, oinsá maka apar ho situasaun refere, signifika  advogadu sira ténke hatene ona la’ós hein Primeiru-Minsitru de’it, maibé oinsá  atu fó sira-nia apoiu tékniku bá iha Primeiru-Ministru hodi garante katak  desizaun ikus ne’e, ita la lakon,” Diretór Ezekutivu Asosiasaun HAK,  Feleciano da Costa Araújo hateten.

Nia hatutan,  se   Governu  lakon  ho empreza Lighthosuse, singfika  Estadu  ténke selu, automatikamente  uza  osan fundu mina-rai

“Sei la ha’u sala ita kona ona kazu kordenasaun sira hanesan  ConocoPhillips  nian, maibé ita la rona kazu ne’e nia Rezultadu to’o ona iha ne’ebé , depois ita sosa saham, ida-ne’e la’ós ema ida maka hasai osan hosi nia bolsu maka sosa, maibé ne’e prevee iha orsamentu jerál estadu ninian, osan fundu minarai maka ita sosa saham,” nia preokupa.

Nia afirma, luta bá kazu ne’e  la’ós ema individuál, maibé luta koletivu, katak akomula idea no paresér  entidade hotu-hotu nian.

“Sé lae kazu ida-ne’e maka ita derota, hanesan ami  pesemis karik, ema sei duun bá  Primeiru-Ministru,  tanba buat hotu ita hakarak halo mesak,” nia hateten.

Nia subliña, espetativa bá rai RDTL ema hotu nian, nune’e kazu  disputa entre Governu ho Lighthouse, ténke konsulta  parte  hotu hodi hetan pareser ida-ke  di’ak  hodi garantia kazu ne’e Estadu ténke manán.

Fó hanoin fali katak, Primeriu Ministru Kay Rala Xanana Gusmão  sei responde iha Trbiunál Supremu  Victória-Melbourne, Austrália,  kona-bá disputa ne’ebé akontese dezde  tinan 2010 liubá  entre Governu Timor-Leste ho empreza internasionál Lighthouse Corporation Pty Ltd.

“Kazu ne’e Governu prepara  hela,  ami bolu advogadu foun,  sira kaer hela ida-ne’e  posivélmente iha fulan-Outubru,  tinan mai  ne’e,  ha’u maka bá responde iha  Tribunál Supremu Victória -Melbourne Austrália  nian,” PM Xanana hateten hafoin enkontru semanaál ho Prezidente Repúblika, José Ramos-Horta iha Palásiu Prezidensiál, Díli, Kinta (23/10/2025).

Xefe Governu Timor-Leste ne’e, alerta  katak, lalika ta’uk ho disputa  entre Governu Timor-Leste ho  empreza  Lighthouse, tanba Governu Austrália mós deklara ona katak ne’e fraude  lentu  iha Austrália nia laran.

“Lalika ta’uk, tanba  buatamak ida uluk kaer  Lighthouse ne’e, Governu Austrália rasik maka dehan  maior faude de lento iha Austrália laran  ne’ebé la lalika hakfodak,” Xanana afirma.

Nia  garantia  katak disputa  ne’ebé iha, empreza Lighthouse sé la manan, mézmu Xanana rasik labele esplika detalallu garantia saida mak Governu iha hodi manan Lighthouse iha Tribunál Supremu Victória.

Reportajen: Marcelino Tomae