Internasionál
PM Xanana Husu Haforsa Diálogu no Páz Ba Estabilidade Rejionál
Hatutan.com, (28 Outubru 2025), Díli— Primeiru-Ministru Repúblika Demokrátika Timor-Leste (PM-RDTL), Kay Rala Xanana Gusmão, haktuir hikas importánsia pás no haforsa diálogu hodi garante dezenvolvimentu sustentável liután iha rejiaun ASEAN tomak.
PM Xanana Gusmão konversa ho jornalista sira iha ámbitu simeira ASEAN ba dala-47 iha Kuala Lumpur, Malázia. Foto/Bernama
sita públikasaun husi ajensia notísioza Malázia ka Bernama, Tersa (28/10/2025) iha haktuir Primeiru Ministru Kay Rala Xanana Gusmão ko’alia ba jornalista sira iha marjen Simeira ASEAN nian ba dala-47 no Simeira sira ne’ebé iha relasaun, hatete katak parseiru sira diálogu ASEAN nian, inklui Xina, Japaun no Koreia-Súl, iha nafatin kompromisu atu serbisu besik ho bloku rejionál hodi hasa’e kooperasaun iha setór oioin.
“Parseiru sira, la’ós de’it Xina, Japaun no Koreia-Súl, maibé ita-nia parseiru sira hotu, iha nafatin kompromisu atu kontinua servisu hamutuk ho ASEAN hodi hadi’a povu nia moris no promove dezenvolvimentu iha setór hotu-hotu,” Xanana hateten.
“Sira mós determinadu atu garante pás iha rejiaun, haruka mensajen klaru ba mundu katak laiha pás, labele iha dezenvolvimentu,” nia dehan.
Komenta kona-ba posibilidade atu ASEAN habelar hodi inklui tan membru sira iha futuru, Xanana Gusmão hatete katak desizaun ne’e sei destaka ho Estadu-membru sira ASEAN nian.
Bainhira husu oinsá nia sente iha konkluzaun simeira nian, Gusmão hatán ho laran-moos, “Honestamente, kole tebes.”
Timor-Leste iha loron 26 fulan-Outubru ne’e, ofisialmente adezaun ba ASEAN nu’udar Estadu membru ba dala-11, hodi marka marku istóriku ida ba nasaun no mós ba bloku ne’e.
Adezaun, Xefe Governu ne’e agrupamenta ho espansaun dahuluk iha tinan 26 nia laran, formaliza liuhosi asinatura Deklarasaun kona-bá Admisaun Timor-Leste nian iha ASEAN.
Prezidente Repúblika José Ramos-Horta espresa ninia prontidaun atu involve diretamente iha esforsu atu rezolve funu sivil iha Myanmar.
“Timor Leste, maski joven liu no nasaun ida ne’ebé kiak liu iha Sudeste Aziátiku, iha esperiénsia naruk kona-ba rekonsiliasaun no kura pós-konflitu,” Prezidente Repúblika Timor-Leste José Ramos Horta hateten banhira entrevista ho Associated Press iha Kuala-Lumpur Malázia.
Nia fiar katak ASEAN presiza aprosimasaun ida ne’ebé realistiku liu hodi enkoraja sesarfogu iha Myanmar, inklui loke diálogu diretu ho militár Tatmadaw.
Premiadu Nobel da Paz ne’e subliña katak forsa morál no diplomasia umanitária bele sai dalan ida ba estabilidade rejionál, enkuantu hametin Timor Leste nia pozisaun nu’udar membru foun ASEAN nian.
Jornalista: Marcelino Tomae