Viqueque
Xefe Suku Afaloikai Husu Populasaun Mantein Situasaun Hakametek iha Selebrasaun Loron Finadu
Hatutan.com, (31 Outubru 2025), Viqueque– Xefe Suku Afaloikai, Postu-Administrativu Uatulari, Munisípiu Viqueque, Cesario Nascimento Pires, husu bá populasaun, liuliu bá joven sira iha Suku Afaloikai atu mantein situasaun hakmatek iha selebrasaun loron finadu ne’ebé kada tinan selebra iha loron 02 fulan-Novembru.
Lee Mós: Governu Aloká Rihun $91 Reabilita Igreja Uatulari Antigu
Xefe Suku Afaloikai, Cesario Nascimento Pires. Foto/Zita Menezes
“Ha’u alerta bá xefe aldeia, delegadu/a sira no mós bá xefe juventude husu bá joven komunidade sira iha Suku Afaloikai favór ida labele hemu-tua lanu tuur iha estrada ibun no labele uza motór nia kanu-resin, nune’e bele kontribui situasaun hakmatek iha selebrasaun loron finadu,” Xefe Suku Afaloikai Cesario Nasimento Pires bá Hatutan.com iha Uatulari Antiga, Sesta (31/10/2025).
Nia husu nafatin estrutura suku sira bele tau-matan, liuliu bá joven sira mai husi Díli tanba sira halo movimentu bá-mai ho transporte labele uza kanu-resin, nune’e labele provóka situsaun hodi hamosu problema.
Tuir autoridade lokál Suku Afaloikai ne’e hateten tuir nian observasaun katak tinan rua ona situasaun iha Suku Afaloikai la’o hakmatek no nia garante bá komunidade sira katak sei laiha problema iha selebrasaun loron finadu iha Suku Afaloikai.
Suku Afaloikai, Postu Administrativu Uatulari, Munisípiu Viqueque pertense ba Aldeia 10 no populasaun uma-kain hamtuk 5673.
Jornalista: Zita Menezes