C12N Husu Aselera Projetu Monumentu Memoriál Masakre Santa Kruz

Hatutan.com, (12  Novembru  2025), Díli-Komité 12 Novembru (C12N)  nu’udár grupu ne’ebé reprezenta sobrevivente sira no família vítima sira husi Masakre Santa Kruz, 12 Novembru 1991, husu Governu atu aselera projetu monumentu memoriál masakre Santa Kruz ne’ebé tinan barak ona seidauk finaliza.

Lee Mós: Irregularidade Boot iha Projetu Monumentu Memoriál Masakre Santa Krús

Konstrusaun monumentu memoriál Masakre Santa Krús. Foto/Dok.

“Ha’u hanoin liga ho asuntu ne’e mak ohin ha’u husu mós bá Governu liuliu Primeiru-Ministru Kay Rala Xanana Gusmão  liuhosi Ministériu Asuntu Kombatente Libertasaun Nasionál (MACLN) aselera konstrusaun monumentu memoriál Masakre Santa Kruz, 12 Novembru,” Prezidente C12N, Filipe Rodrigues Perreira, informa bá jornalista sira iha Santa Kruz, Dili, Kuarta (12/11/2025).

Kontrusaun monumentu memoriál Masakré Santa Kruz, 12 Novembru 1991 ne’e hahú kedan iha VIII Governu ne’ebé ezekuta husi kompañia Bobalit, Lda,  depois iha IX Governu para tiha uituan tanba problema produsaun monumentu ne’ebé atu monta iha moru leten no mós monumentu neen iha laran.

Projetu monumentu Memoriál Santa Krús, 12 Novembru 1991 ne’e ho  nia kustu millaun $1,385,   ne’ebé empreza nasionál Bobolait, Lda hahú ezekuta iha 2021 ho primeiru kontratu ho durasaun tinan ida, hahú hosi loron 22 fulan-Setembru 2021 to’o loron 22 fulan-Setembru 2022 no períodu kontratu ne’e rasik termina ona. 

“Nune’e ohin ita ko’alia ho Primeiru-Ministru maun-boot Kay Rala Xanana Gusmão atu tau atensaun mós bele ko’alia  Ministru MACLN  Gil Monteiro Oan Soru bele aselera produsaun monument 12 Novembru ne’e,” Filipe Rodrigues Perreira  hateten.

Monumentu ne’e atrazu  tanba Governu anterior tau osan $300,000.00 itál bá monumentu, nune’e  iha VIII Governu komité 12 Novembru ezizi atu monumentu ne’ebé mak iha tenke ho  kualidade.

“Ami lakoi monumentu ne’ebé mak laiha kualidade, entaun iha IX Governu nian sira foti amostra husi estatua Amu Papa João Paulo II entaun MACLN halo diskusaun ho C12N no hakarak halo kualidade ne’ebé hanesan mós ho estatua Amu Papa João Paulo II nian,” nia tenik.

Kompaña tolu iha Portugal deside ida mak manan, maibé problema osan ne’e sa’e maka’as tiha entaun ne’e mak sai tiha kestaun boot, entaun Kafi husu MACLN atu halo justifikasaun bá orsamentu ne’ebé sa’e aas tiha ida-ne’e mak sai problema.

Prezidente komité 12 Novembru ne’e afirma tuir nia haree katak  projetu ne’e foin atinje 50%,  presiza atinje tán 50% nune’e  fatin bá konvidadu sira tuur ne’e  apoiu husi embaixadór  Uniaun Europeia mak harii.

Jornalista : Zita Menezes