Nasionál
AJTL Dezafia RTTL,E.P ho Tatoli, I.P Hatudu Editoriál Independente
Hatutan.com, (13 Novembru 2025), Díli—Asosiasaun Jornalista Timor Lorosa’e (AJTL) dezafia média Estatál hanesan Rádiu Televizaun Timor-Leste, Empreza Públiku (RTTL.E.P) ho Ajénsia Notísioza Tatoli, Institutu Públiku (I.P) hatudu editoriál Independete hodi garantia liberdade espresaun no liberdade imprensa iha Estadu direitu Demokrátiku Timor-Leste nian.
Prezidente AJTL, Zevonia Vieira. Foto/Dok
Prezidente AJTL, Zevonia Vieira, Kinta (13/11/2025), bá Hatutan.com, hateten bazeia bá relatóriu organizasaun internasionál ba liberdade imprensa ka Reporters Without Borders (RSF) nota katak nomeasaun afiliadu governu nian ba pozisaun diresaun superiór sira iha emisora nasionál Rádiu Televizaun Timor-Leste, Empreza Públiku (RTTL,E.P) no Ajénsia Notísioza Estatál Tatóli, Institutu Públiku (I.P) nu’udár prátika ida ne’ebé bele estraga RTTL, E.P ho TATOLI, I.P nia independénsia editoriál.
“Liu-Liu bá Média Estatál sira ne’ebé maka ita rona informasaun katak sempre iha interferensia husi Governu atu bele tuir saída maka Governu hakarak, AJTL lakohi ida-ne’e atu akontese, ita hakarak atu sai modelu di’ak bá nasaun sira seluk,” Zevonia Vieira hateten durante Forum Literasia Dijitál no Mundu Artifisial Intelijénsia iha Salaun HAK, Faról, Díli.
Nia hatutan, tinan ida-ne’e, Timor-Leste ninia ranking Liberdade imprensa ho Liberdade espresaun tun bá iha 39, tanba ne’e AJTL kontinua preokupa ho situasaun ne’ebé liga ho servisu jornalista nian.
Nia espera katak husi esperensia liberdade espresaun no imprensa ne’ebé tun ba bibeik husi tinan da tinan, AJTL kontínua ezijé bá Governu no bá institusaun sira ne’ebé maka iha tentasaun limite Liberdade impresaun atu tane aas prinsipiu Liberdade imprensa ho espresaun ne’ebé konsagra iha K-RDTL artigu 40 ho 41.
“AJTL la tuur nonok kontínua hakilar atu fó hanoin katak, se bainhira ita nia Liberdade imprensa monu tun nafatin signifika ita nia demokrásia monu iha Timor,” nia dehan.
Nia tau esperansa bá Governu no mós institusaun sira seluk kontínua garantia Liberdade imprensa no espresaun, tuir konstitsaun ne’ebé maka iha ona, labele halo tentativa atu infulensia redasaun politika no mós ekonómia
Nia hatutan, Timor-Leste adere ona bá ASEAN, AJTL nia esperansa, Estadu Timor-Leste la tuir nasaun ditadura, no kontínua ameiasa ninia jornalista no media sira
Iha fatin hanesan Sekretáriu Estadu Komunikasuan Sosiál (SEKOMS), Expedito Dias Ximenes haktuir, Governu ida-ne’e garantia no komprimitudu atu garantia Liberdade imprensa ho Liberdade espresaun.
“Sé ema ruma hakarak ka podér Pólitika no póder ekonónia atu hlao intervensaun, ha’u hanoin organizasaun jornalista bele hamrik hodi kontra,” Expedito Dias Ximenes hateten.
Nia afirma, Governu ne’e prometidu atu nafatin garante Liberdade imprensa ho Liberdade espresaun no komprometidu hodi ema labele book tanba tuir Expedito Dias Ximenes Liberdade imprensa ho Liberdade espresaun hanesan fuan ho raan ho iss bá Demokrásia.
Fó hanoin fali Organizasaun internasionál ba liberdade imprensa ka Reporters Without Borders (RSF) nota katak nomeasaun afiliadu governu nian ba pozisaun diresaun superiór sira iha emisora nasionál Rádiu Televizaun Timor-Leste, Empreza Públiku (RTTL,E.P)no Ajénsia Notísioza Estatál Tatóli, Institutu Públiku (I.P) nu’udár prátika ida ne’ebé bele estraga RTTL, E.P ho TATOLI, I.P nia independénsia editoriál.
Iha komunikadu imprensa ne’ebé Hatutan.com asesu, Tersa (11/11/2025), haktuir Asosiasaun jornalista sira iha Timor-Leste no Konsellu Imprensa Timor-Leste regularmente denúnsia interferénsia polítika iha mídia públika, notavelmente liuhosi nomeasaun afiliadu governu nian ba pozisaun diresaun superiór sira iha emisora nasionál RTTL EP no ajénsia notísia estatál Tatóli -prátika ida ne’ebé bele estraga sira-nia independénsia editoriál.
Iha komunikadu ne’e RSF husu bá autoridade sira Timor-Leste nian atu implementa reforma sira neʼebé sei permite nasaun atu enkarna modelu ida abertura no transparénsia, no hanesan modelu liberdade imprensa iha Sudeste Aziátiku.
Joranlista: Marcelino Tomae