FRETILIN Kestiona Projetu Konstrusaun Edifísiu Sentrál RTTL,E.P Paradu

Hatutan.com, (18 Novembru 2025),Díli— Bankada Fretilin  iha Parlamentu Nasionál kestiona projetu konstrusaun Edifísiu Sentrál Rádiu Televizaun Timor-Leste, Empreza Públika (RTTL,E.P) ne’ebé foin hala’o servisu fulan-balu deit paradu no faille total.

Lee Mós: Deskonfia, Abuzu Podér no Korrupsaun iha Projetu Konstrusaun Edifísiu Sentral RTTL,E.P

Projetu konstrusaun Edifisiu Sentral foun RTTL,E.P ne’ebé la’o atraza to’o paradu. Foto/Supply

Iha debate orsamentu Jarál Estadu (OGE, sigla portugés) 2026 iha faze espesialidade iha Parlamentu Nasionál, Tersa (18/11/2025), membru PN husi Bankada FRETILIN Antóninho Doutel Sarmento, fó nia observasaun ba projetu ne’e katak prjetu edifísiu sentrál RTTL,E.P la iha mudansa signifikativu iha ezekusaun.

“Projetu konstrusaun edifíu foun RTTL,E.P paradu hela, ha’u la’o liubá hosi ne’ebá ne’e  ha’u haree dezemvolvimentu la funsiona, tanba saída maka buat sira  ne’e halo hanesan ne’e projetu ne’e rasik laiha preparasaun kle’an  ka kompaña halo fali konta foun maka  atraza hela, situasaun sira hanesan ne’e  ha’u  hein esplikasaun,”  Deputadu Antoninho Doutel Sarmento hateten.

Hatan bá preokupasaun ne’e  Sekretáriu Estadu  Komunikasaun Sosiál  (SEKOMS) Expedito Dias Ximenes, esplika katak  tanba rai iha Caicoli nian kompaña PT Aulia Multi Sarana halo konstrusaun  durante fulan-tolu  atu hetan fundasaun ne’ebé di’ak  no  kle’an tanba  Radiu Televizaun Timor-Leste, Empreza Públiku iha andar haat, maibé  to’o fulan-tolu la konsege hetan fundasaun ne’ebé di’ak.

Expedito hateten empreza internasionál husi Indonézia, PT Aulia Multi Sarana halo servisu fulan-tolu hodi hasai bee nalihun iha lokal obra, maibé la konsege hasai tiha, nune’e halo propósta foun bá UNDP   hodi husu  aumenta tan osan adisionál miliiaun US$3 hodi kontínua konstrusaun. Maibé,  UNDP ho Governu Japaun la aseita, tanba ne’e empreza PT Aulia Multi Sarana rejigna aan husi projetu konstrusaun.

Nia afirma,  UNDP hato’o ona relatóriu bá Governu haree katak re-dezeñu  bá fali edifísiu ida-ne’e no UNDP promete katak iha fulan-Dezembru,  tinan ida-ne’e, sei hahú fali tanba sei halo dezeñu  depois  loke fali konkursu foun  bá públiku.

“Loos duni Edifisiiu bá konstrusaun ne’e paradu hela, UNDP ho Governu Japaun  liuhosi Embaixada Japaun iha Díli halo hela preparasaun bá   atu kontínua.  Sira promete konstrusaun ne’e sei hotu iha tinan 2027,” Expedito Dias Ximenes haktuir.

Konstrusaun Edifisiu Sentrál Radiu Televizaun Timor-Leste, Empreza Públiku ne’e apóia husi Governu Japaun ho montante invesitmentu millaun $5.9 ne’ebé fahe bá  formasaun ba jornalista sira   millaun US$4.4 no bá  iha konstrusaun edifisiu RTTL nian bá andar haat.

Expedito hatutan, orsamentu ida-ne’e Governu Japaun fó direita bá  UNDP maka jere  hanesan implementadór bá projeitu.  Governu bele halo lansamentu bá  Primeira Pedra no Governu  hein atu simu edifisiu ida-ne’e, tanba jestaun hotu iha UNDP nia lideransa.

Expedito  haktuir tan, iha fulan Fevereiru 2025,  Governu lansa  Primeira Pedra direita husi Primeiru-Ministru Kay Rala Xanana Gusmão. Iha aprovizionamentu ne’ebé  UNDP halo konkursu internasionál  husi empreza internasionál  barak ne’ebé tuir, inklui empreza nasionál.

“Empreza PT Aulia Multi  Sarana husi indonézia maka manán iha momentu ne’ebá , konstrusaun ne’e hahú iha fulan-Fevereiru 2025,” Expedito esplika.

Primeiru-Ministru Kay Rala Xanana Gusmão haktuir,  área  iha  Caicoli bee nakonu, tanba rai ne’e uluk antes atu Indonézia  tama, área ne’e Lagua boot.

“Problema maka iha Estudu sira haree tiha  sukat rai  atu tau ona,  maibé problema  boot iha ita nia rain iha ne’ebá  no mós bee barak  hodi aumeta fali kbiit  husi ninia baze,” Xanana esplika.

Fó hanoin fila fali katak, projetu konstrusaun edifisiu sentrál Radiu Televizaun Timor-Leste, Empreza Públika (RTTL,E.P) ho kustu total US$3,760,405.00 neʼebé ezekuta husi kompañia internasionál PT Aulia Multi Sarana husi Indonézia la’o atraza tebetebes.

Projetu ne’ebé sai hanesan legacy husi Governu da-ualu (8) liuhusi Ministériu Asuntu Parlamentár no Komunikasaun Sosiál (MAPKOMS) no ezersísiu estra-ordináriu husi Prezidente Konsellu Administrasaun RTTL, E.P altura ne’ebá José António Belo “Taraleu”, konsege hala’o nia lansamentu ka hatuur fatuk-inan, husi Primeiru-Ministru (PM), Kay Rala Xanana Gusmão iha loron 19 fulan-Dezembru tinan 2024.

Sura husi loron serimónia hatuur fatuk-inan to’o agora empreza internasionál husi Indonézia, PT Aulia Multi Sarana, seidauk hatuur nia fundasaun ka fondasi no seidauk hatudu esforsu ba mobilizasaun ekipamentu iha terrenu konstrusaun tanba empreza enfrenta difikuldade no prejudika progresu konstrusaun la’o tuir nia kontratu servisu.

Edifísiu sentrál RTTL,E.P nian ne’e tau naran Francisco Borja da Costa iha andar haat (4) kompletu ho estudiu rádiu ho televizaun, fatin servisu ho ezekutivu, ho totál administrasaun no jornalista na’in-600.

Iha andar da-haat leten ne’e fatin sorumutuk ho naran auditóriu Nino Konis Santana ho kapasidade akomula ema na’in-1000.

Iha fulan-Outubru tinan 2023, UNDP lansa konkursu dezeñu ho site assessment no hafoin iha fulan-Jullu tinan 2024 no fulan-Agustu 2024 hetan aprovasaun bá dezeñu husi Ministériu Obras Públika (MOP) depois lansa kedan bá konsursu internasionál hodi hetan kompañia internasionál husi Indonézia PT Aulia Multi Sarana hanesan manan na’in ba konkursu internasionál ne’e ho totál kustu ba projetu ne’e $3,760,405.00.

Iha akordu neʼebé estabelese ho parte sira, liuliu UNDP no Governu Timor-Leste liuhusi Sekretáriu Estadu Komunikasaun Sosiál (SEKOMS) iha mandatu Governu da-sia (9) nian ne’e, kompañia PT Aulia Multi Sarana kompromete atu hatama nia ekipamentu rasik, modernu no sufisiente, maibé realidade PT Aulia Multi Sarana aluga de’it eskavadora ida ho karreta baskulante rua (2) ka tolu (3) husi empreza nasionál TINOLIN, Lda, maibé to’o agora fasilidade sira ne’e la estasiona ona iha fatin projetu, inklui terrenu projetu nian la hatudu progresu no paradu totál.

Jornalista:Marcelino Tomae