Dili
Ema Sona Membru CSP Ida iha Vila-Verde, Identifika Suspeitu Na’in-hitu
Hatutan.com, (20 Novembru 2025), Díli– Membru Polísia Nasional Timor-Leste (PNTL) husi Korpu Seguransa Pesoal (CSP, sigla portugés), Ajente Prinsipal José Lino Arcanjo Thomas, hetan sona iha parte kakorok, liman loos nian, iha Vila-Verde, Kinta dadeer (20/11/2025), hale’u tuku 04:00 Otl.
PNTL asegura suspeitu sira ne’ebé envolve iha kazu sona membru CSP iha Vila-Verde, Kinta dadeer (20/11/2025). Foto/Juvinal Cabral dos Santos
Husi insidente ne’e Polísia halo ona identifikasaun suspeitu na’in-hitu (7) no membru CSP Ajente Prinsipal, José Lino Arcanjo Thomas, agora dadaun halo hela tratamentu intensivu iha Ospitál Nasional Guido Valadares (HNGV) ho kondisaun saúde grave.
“Akontesimentu iha Aldeia Lemorai, Suku Vill-Verde, Dili, iha grupu balun mak asaltu ba malu depois rezulta membru CSP ida hetan kanek,” Komandante Polísia Nasional Timor-Leste (PNTL) Munisípiu Díli, Superintendente Xefe Polísia Orlando Gomes, informa ba jornalista sira iha Komandu Munisípiu Díli.
“Nia alin ba bolu tan ninia maun alin sira husi fatin seluk mai hamutuk iha festa despedida entaun sira konsumu tua iha ne’ebá hamosu konflitu akontese resulta ita-nia membru CSP ida hetan kanek,” Komadante PNTL Munisípiu Díli ne’e haktuir.
Polísia asegura suspeitu na’in-hitu iha sela detensaun. Foto/PNTL
Hafoin akontesimentu ne’e Eskuadra Polísia Dom Aleixo no forsa rezerva halo atuasaun kedas hodi netraliza situasaun ne’ebé mak iha Aldeia Lemorai, Suku Villa-Verde.
“Ita seidauk hatene iha prosesu investigasaun mak hatene uza saida mak to’o ita-nia membru CSP ne’e hetan sona kanek, kona-ba ba kazu konfrontu depois investigasaun mak foin hatene membru CSP nia involvimentu ne’e iha ne’ebé,” Komadante Polísia Munisípiu Díli informa.
Autoridade seguransa halo identifikasaun ba suspeitu sira ne’e depois prosesu investigasaun mak detekta se mak involve iha ne’ebá mak hato’o ba Ministériu Publiku (MP) hodi detein 72 horas kontinuasaun ba prosesu.
Jornalista: Juvinal Cabral dos Santos