Elimina Diresaun Inspesaun Auditória no Kontrolu Kualidade Bazeia Ba Estatutu Foun UNTL

Hatutan.com, (25 Novembru 2025), Díli-Despaxu Reitór Universidade Nasionál Timor Lorosa’e (UNTL)  hodi hapara ka elimina tiha Diresaun Inspesaun Auditória Kontrolu Kualidade UNTL bazeia ba estatutu foun UNTL nian rasik.

Lee Mós: Reitór UNTL Halakon Diresaun Inspesaun Auditória no Kontrolu Kualidade Tanba Sei iha Fiskál Úniku

Prezidente CFP, Agostinho Letincio de Jesus. Foto/Juvinal Cabral dos Santos

“Ha’u seidauk akompaña detallu, maibé prosesu ida ne’e parese  bazeia ba desizaun ne’ebé mai husi Ministériu Ensinu Superiór liga ho estatutu foun UNTL nian,” Prezidente Komisaun Funsaun Públiku (CFP, sigla portugés),  Agostinho Letincio de Jesus,  informa hodi responde jornalista sira hafoin partisipa serimonia atribuisaun sertifikadu ba formadu nivel nasionál iha salaun Ministériu Transporte  no Komunikasaun (MTK),  Díli, Tersa (25/11/2025).

Nia hateten kuandu iha redusaun estrutura ne’e sempre baze ba rezolusaun ruma no akompaña katak iha tempu hirak liubá diskuti hela kona-ba estrutura UNTL ne’e rasik. Nune’e,  parese iha desizaun sira ne’e mak iha, desizaun kona-bá eliminasaun gabinete refere. Maibé, surjere orgaun komunikasaun sosiál  sira atu akompaña  desizaun sira ne’e iha Konsellu Ministru (KM).

Nia esplika liga ho CFP nia papel importante ne’e mak ba nomesaun sira baze ba estrutura ruma. Agora liga ho dezenvolvimentu organizasaun ne’e rasik, ne’e depende ba estatutu kada instituisaun ho estatutu kada ministériu.

CFP nia papel ne’e mak nomeasaun pesoa iha buat rua, iha ida ko’alia kona-bá dezenvolvimentu instituisional, ida fali ko’alia kona-bá jestaun pesoa. Dezenvolvimentu instituisaun ne’e kabe ba ministériu ida-didak atu defini enkuantu liga ho jestaun pesoa ne’e depende ba organizasaun ne’e rasik.

Fó hanoin fali katak Dirijente sira iha Diresaun Inspesaun Auditoria Kontrolu Kualidade Universidade Nasional Timor Lorosa’e (UNTL), Sesta (14/11/2025), hato’o keixa ba Diresaun Servisu Investigasaun Kriminál (DSIK) Polísia Nasionál Timor-Leste (PNTL hasoru Reitor UNTL João Soares Martins.

Jornalista: Juvinal Cabral dos Santos