Polísia Konfirma Abitante Ne’ebé Mate iha Fatin Kumu-Isin Kauza Husi Moras Fuan

Hatutan.com, (26 Novembru 2025), Díli– Porta-voz  Polísia Nasionál Timor-Leste (PNTL),  Superintendente  Polísia João Belo dos Reis, konfirma katak abitante ho inisiál AS ne’ebé mate iha fatin komu-isin balu iha área Fatuhada, Díli, Tersa (25/11/2025) hale’u tuku 14:00 Otl, tanba kauza husi moras fuan.

Portavós PNTL Superintendente Polísia Joăo Belo dos Reis. Foto/dok

Porta-voz PNTL  Superintendente Polósia, João Belo dos Reis liuhosi konferénsia  imprensa iha Kuartel Jerál PNTL,  Kuarta (26/11/2025) hateten,  informasaun ne’ebé relasaun ho abitante ida ne’ebé mate iha fatin kumu-isin, parte Forensik husi Diresaun Investigasaun Kriminál nian bá kedan iha fatin akontesimentu hodi responde insial no lori kedan mate isin ba  Ospitál Nadionál Guido Valadares (HNGV).

“Rezultadu patologia ita doutor sira halo ona, operasaun balu ne’ebé rezultadu patologia indiká katak vitíma la hetan violensia ruma ka atentadu kriminál ruma, rezultadu inisial patologia indiká katak vizita hetan moras fuan ka suspeita atake kardíaka, ne’ebé kauza bá nia mate,” Superintendente Polísia João Belo dos Reis informa.

Nia esplika medida investigasaun mézmu karik investigasaun preleminar indika doensa natural no PNTL sei kontínua halo prosedimentu legál sira hanesan, koleta informasaun no tesmuña husi fatin akontesimentu, inklui na’in bá fatin kumu-isin no mós kolaboradór sira iha fatin kumu-isin ne’e.

PNTL sei verifika mós CCTV iha arredor ne’ebá halo dokumentasaun komplementár, hodi garante transparansia no klaridade bá prosesu investigasaun nian.

“PNTL la’o ho prinsipíu transparánsia no profisionalizmu. Ami hakarak garante bá públiku katak ami lori kazu ne’e ho seriédade no mós respeitu bá ema moris nian, ami mós hateten bá públiku atu lakohi, halo interpretasaun laloos ka divulga informasaun ne’ebé la verifika tanba prosesu invetigasaun seidauk remata,” nia tenik.

Porta-voz PNTL ne’e afirma laiha indikasaun matebian AS hemu ai-moruk ruma, maibé PNTL  deteta nia iha aimoruk mediku balu ne’ebé hanesan paracetamol no mós ai-moruk bá tensaun nian.

Jornalista: Zita Menezes