PNTL Hala’o Buska no Apreensaun Ba Jogu Grand Dragon Lotária

Hatutan.com, (03 Dezembru 2025), Díli- Polísia Nasional Timor-Leste (PNTL) liuhusi Diresaun Servisu Investigasaun Kriminál (DSIK)   lidera husi Superintendente Asistente Polísia Mouzinho T. Correia, hamutuk ho Servisu Migrasaun  hala’o buska no apreensaun ba jogu Grand Dragon Lotaria  ne’ebé lokaliza iha Pantai Kelapa besik Timor Plaza inklui nia sukursal iha Timor Plaza.

Polísia halo buska no apreensaun ba jogu Grand Dragon Lotaria, Kuarta (03/12/2025). Foto/Juvinal Cabral dos Santos

Polísia halo buaska no apreensaun ne’e baze ba mandadu  husi Ministeriu (MP) liuhosi autorizasaun Prokurador João Marques ho prosesu krime NUK: 0389/2025-PNSIK tanba deskonfia fraglante delitu.

Tuir observasaun Hatutan.com iha terenu, hale’u tuku 16:10 PNTL liuhusi Diresaun Servisu Investigasaun Kriminál (DSIK)   lidera husi Superintendente Asistente Polísia Mouzinho T. Correia, hamutuk ho Servisu Migrasaun  tama ba fatin  jogu Grand Dragon Lotária  ne’ebé lokaliza iha Pantai Kelapa besik Timor Plaza.

Superintendente Asistente Polísia Mouzinho T. Correia informa ba agente traballadór sira iha laran  katak atividade temporariamente suspende lai no alert aba traballadór sira hakmatek  no telefone tau tun labele book telefone.

Polísia kontinua hasoru jerente hodi aprezenta PNTL nia prezensa iha jogu Grand Dragon Lotária hodi aprezenta mandadu  husi Ministeriu Públiku (MP) nune’e haruka traballadór sira provizoria hapara atividade hodi polísia hala’o nia servisu.

Autoridade seguransa asegura sasan  iha jogu Grand Dragon Lotária lokaliza iha Bebonuk besik Timor Plaza inklui nia sukursal Timor Plaza total husi sasan ne’ebé asegura mak kumputer kuaze besik sanulu liu, telfone besik rua-nulu, inklui osan besik milaun ida, kwitansia/kupon  no seluk tan.

Hale’u 18:00 lorokarik, Kuarta (03/12/2025) Jerente nain tolu,  traballadór sira hamutuk nain-15 mak ba halo ona identifikasaun iha Komandu Jerál Polísia Nasional Timor-Leste (PNTL), jerente ho inisiál MFMP inklui estranjeiru na’in rua kontinua ba detensaun kumpri 72 oras iha sela Caicoli.

Iha fatin hanesan Jerente ba  jogu Grand Dragon Lotaria ne’e lamenta tebes ho Polísia Nasional Timor-Leste iha sira nia fatin halo buska.

“Ha’u esplika ba sira katak agora dadauk ha’u nia atividade la’o hela la iha indisiu krime ruma, depois ha’u nia sasan sira foti hotu agora ha’u atu halo servisu oinsá, agora ha’u atu fó de’it avizu ba kliente sira mós labele la iha autorizasaun, sira dehan so foti tiha ita-boot nia deklarasaun mak ko’alia,”  jerente jogu Grand Dragon Lotária ho inisiál MFMP hateten.

Liuhusi konversa nia hatutan, mandadu la iha  buat ida, la iha mai de’it, agora jogu ida Lotaria ne’e jogu Timoroan de’it mak joga tanba registu ho númeru +670 de’it.

“Hanesan jerente jogu lamenta liu estadu haruka ita moderniza ba jogu dijital, ita selu impostu besik tinan tolu atu ba tinan haat, agora ita mak sala fali,” nia afirma.

Jerente ne’e dehan agora jogu Grand Dragon Lotária ne’e jogu rai laran domestika katak mákina ne’ebé produs ne’e so bele simu simcard telefone  ne’ebé mak +670 de’it mak bele prenixe numeru husi estranjeiru ne’e labele, mais sira la kompriende ida mai de’it la akompaña tan ho Inspesaun Jerál Jogu (IGJ) mós la iha.

Jornalista: Juvinal Cabral dos Santos