PM Xanana Tun Direta Taka Grand Dragon Lotaria Atu Dezvia Autór Sira Fasilita Jogu Scam iha Timor-Leste

Hatutan.com, (05 Dezembru 2025), Díli-Diretór Asia Justice and Rights (AJAR), José Luis Oliveira, konsidera atuasaun Primeiru-Ministru (PM) Kay Rala Xanana Gusmão  nian hodi tun direta taka Litaria Grand Dragon nu’udár aktu ida atu dezvia atensaun bá prosesu autór fasilita jogu scam Timor-Leste.

Lee Mós: Deskonfia Loke Jogu Online, PM Xanana Haruka Taka Lotaria Grand Dragon

Diretór AJAR, José Luis Oliveira. Foto/Juvinal Cabral dos Santos

“Mai ha’u iha duvida oituan.   Primeiru-Ministru nia intervensaun ne’e puru atu kombate duni buat ida jogu scam ne’e ka lae?  Tanba buat ida jogu online ne’e la’ós hotu-hotu scam jogu balun legál tanba ne’e mak ema fó lisensa, ida perigozu ne’e mak ida scam ne’e, mai ha’u deskonfia koko atu dezvia atensaun karik, koko atu taka tiha matan atu salva, tanba to’o agora la iha prosesu ida, la iha medida ruma bá ema sira ne’ebé iha indikasaun forte sira mak fasilita scam ne’e mai,” José Luis de Oliveira, hateten  bá jornalista sira iha edifisiu AJAR, Farol, Díli, Sesta( 05/12/2025).

Tuir nia, jogu ida hanesan iha Oé-Cusse ne’e mak scam ka bosok agora hakarak hatene to’o iha ne’ebé ona governu investiga ba jogu scam iha Oé-Cusse  ne’e.

“To’o iha ne’ebé ona PCIC deskobre jogu scam iha Oé-Cusse ne’e. Duvida boot mai ha’u,” José Luis Oliveira kestiona.

José Luis Oliveira, dehan tenke deskonfia tanba momentu ema ida lori scam ne’e mai ne’e simu husi na’I ulun balu orgaun soberanu RDTL ne’e nian, inklui membru Governu balu, maibé investigasaun ne’e hamosu duvida.

Nia esplika, tuir lolos Konsellu Ministru deside hodi loke investigasaun bá  scam iha Oé-Cusse no Primeiru-Ministru tenke halo prosesu bá ministru ida fó lisensa ne’e kona-bá tanba saida sira fó lisensa.  La’ós haruka bá taka nia rasik tun bá sobu, ne’e hanesan Primeiru-Ministru ezerse hela podér judisiál.

Nia argumenta, jogu Grand Dragon Lotaria ne’e hamriik tanba  bazeia bá legalidade ruma,  ema sira fó lisensa ne’e Primeiru-Ministru seidauk atua nia, bá atua  fali ema ida baibain ne’e.

“La’ós jogu hotu ilegál, sé dehan ne’e ilegál tenke hatudu Leí, tanba ita nia Leí ne’e legaliza jogu sira  ne’e, tanba ne’e empreza RUDAL eziste, KISS eziste no sira seluk tan, soké dalaruma ita haree bá deskriminativu uituan, tanba jogu bola guling taka, mas jogu ida  lotaria ne’e loke,” nia hateten.

Mais atu dehan jogu ida ne’e la’ós ilegál tanba Konsellu Ministru la’ós Tribunál, tuir loloos Konsellu Ministru hasai desizaun atu loke investigasaun bá membru Governu sira ne’ebé, inklui Prezidente Republika (PR) tenke loke investigasaun bá nia. 

Nia kestiona, tanba saida mak Primeiru-Ministru tun rasik,  sé karik ninia ajente estadu sira ne’e mak la iha kapasidade ne’e mak troka, ka ajente estadu ne’e halo hela tuir Leí mak Primeiru-Ministru mai obriga de’it ne’e viola Leí.

Jornalista: Juvinal Cabral dos Santos