Tribunál Aplika Medida Aprezentasaun Periódika Bá Jerente Grand Dragon Lotaria

Hatutan.com, (06 Dezembru 2025), Díli– Tribunál Judisiál Primeira Instánsia Díli (TJPID),  Sábadu (06/12/2025), hala’o julgamentu primeira interogatóriu ba arguidu na’in-tolu husi empreza jogu Grand Dragon Lotaria.

Lee Mós: Deskonfia Loke Jogu Online, PM Xanana Haruka Taka Lotaria Grand Dragon

Jerente Lotaria Grand Dragon nu’udár arguidu partisipa iha juglamentu primeira interogatóriu iha TJPID, Sábadu (06/12/2025). Foto/Marcelino Tomae

Iha julgamentu primeira interogatóriu ne’e, Tribunál aplika medida aprezentasaun periódika durante fulan-haat (4) ba arguidu na’in-tolu ne’ebé nu’udár jerente ba empreza Grand Dragon Lotaria.  

Arguidu na’in-tolu ho insiál NGT, VJ, MFDPM ne’e hetan detensaun no apreensaun husi autoridade Polísia, Kuarta (03/12/2025), iha empreza Grand Dragon Lotaria tanba deskonfia envolve iha pratika jogu online ka online scamming.

Durante audénsia julgamentu primeiru interogatóriu ne’e, Tribunál liuhosi  Juiza Julmira  Auxiliadora konfirma bá arguidu na’in-tolu  atu hato’o deklarasaun ruma bá Tribunál, maibé arguidu sira hili nonook.

Iha alegasaun Ministériu Públiku ne’ebé reprezenta husi   Prokuradór Rafael Gusmão  ho João Marques, husu Tribunál atu aplika medida proibuisaun aujénsian no   medida koasaun US$10,0000.00 bá  arguidu sira,  tanba konsidera  prátika krime jogu ilegál ho krime brankeamentu kapitál.

Parte defeza liuhusi  Advogadu Privadu, José Ximenes, husu Tribunál atu aplika Termu Identidade  Rezidénsia (TIR) tanba jogu Litaria Grand Dragon legál no iha dokumentu lisensa sei   moris  no selu taxa bá Estudu.

Rona tiha parte hotu-hotu Tribunál hatun despaixu hodi aplika Aprezentasaun Periódika, durante  fulan haat bá arguidu  na’in-tolu nu’udár jerente ba empreza Grand Dragon Lotaria.

Hafoin  remata julgamentu primeiru interogatóriu, Tribunál ho parte defeza asina karta libertasaun bá arguidu, nune’e parte seguransa akompaña arguidu na’in-tolu bá hasai faru detensaun iha Komandu Jerál Polísia Nasionál Timor-Leste (PNTL).

Jerente Grand Dragon Lotaria na’in-tolu ho inisiál NGT, VJ ho MFDPM sai  arguidu no detein iha sela detensaun polísia durante oras 72 nia laran, hafoin buska no apreensaun ne’ebé bazeia ba mandadu Ministériu Públiku ho Númeru Úniku Krime (NUC), 0389/2025.PNSIC, iha Kuarta (03/12/2025), tanba deskonfia prátika online scamming.

Jornalista: Marcelino Tomae