PNTL Detein Suspeitu Na’in-Tolu Asalta Rezidénsia Vise-Primeiru Ministru Francisco Kalbuadi Lay

Hatutan.com, (11 Dezembru 2025), Díli-Polísia Nasionál Timor-Leste (PNTL) detein suspeitu na’in-tolu ho inisiál VS, NDS no GJ iha Eskuadra Polísia Nain Feto, ne’ebé asaltu rezidensia Vise-Primeiru Ministru ba Asuntu Ekonomia no Ministru Turismu Ambiente, Francisco Kalbuadi Lay  iha Audian, Kuarta-kalan (10/12/2025).  

Polísia detein suspeitu na’in-tolu ne’ebé halo asalta ba Vise-PM Francisco Kalbuadi Lay nia rezidénsia iha Santa Krús, Dili, Kuarta-kalan (10/12/2025). Foto/ Espesiál

“Kuarta-kalan, 10 fulan- Dezembru tinan 2025, hale’u tuku 20:00 Otl, Polísia simu informasaun katak iha asaltu ida rezidénsia Vise-Primeiru Ministru ba Asuntu Ekonomia no Ministru Turismu Ambiente, Francisco Kalbuadi Lay  iha Audian,” Komadante PNTL Munisipiu Díli, Superintendente Xefe Polísia Orlando Gomes informa ba jornalista sira iha Eskuadra Polísia Dom Aleixo, Kinta(11/12/2025).

Superintendente Xefe Polísia Orlando Gomes haktuir kronolojia, vitima ida naran Mariano Barreto ne’ebé mak hanesan pesoál seguransa iha rezidénsia Vise-PM ninian hela iha Caicoli atu mai servisu no bainhiras to’o iha rezidensia hetan asaltu husi sidadaun na’in-tolu ho inisiaá VS, NDS, GJ hodi tuku, tebe vitima  hetan pankada iha matan fukun parte loos bubu boot.

Vitima ne’e komu mesak deit, labele hasoru sira na’in-tolu, nune’e vitima halai ba uma laran  foti samurai duni suspeitu nain hirak ne’e.

“Lakleur ita nia patrolla mós to’o ona iha fatin suspeitu konsege halai ses tiha, maibé ita nia patrolla kontinua duni tuir hodi kaptura kedas suspeitu na’in-tolu hodi lori mai identifikasaun oras 12 nia laran iha eskuadra Polísia Nain Feto,” Orlando Gomes haktuir.

Motivu husi kazu ne’e kona-bá servisu tanba vitima hela iha Caicoli, maibé mai servisu fali iha Santa Krús no joven sira ne’e hela iha Santa Krús.

Jornalista: Juvinal Cabral dos Santos